Hauteskundeak

Geroa Baik primarioak abiatu ditu lehendakaritzarako eta Iruñeko alkatetzarako hautagaiak aukeratzeko

Irailaren 15erako eman behar du izena aurkeztu nahi duenak. Elebiduna izatea ezinbesteko baldintza izango da.

Uxue Barkos, iazko urte politikoaren amaiera ekitaldian.
Uxue Barkos, iazko urte politikoaren amaiera ekitaldian. Villar Lopez/Efe

Berria -

2018ko irailak 6

Bi hautagaitzetarako baldintza berberak jarri ditu koalizioak: euskaraz eta gazteleraz jakitea, eta gutxieneko babesa izatea. EAJ, Atarrabia Taldea, Zabaltzen edo Atxikitakoen taldearen babesa; bi herriguneren babesa; edo 15 geroabaikideren babesa beharko du lehendakaritzara aurkeztu nahi duenak. Iruñeko alkate izateko borrokatu nahi duenak, berriz, EAJ, Zabaltzen edo Atxikitakoen taldea baten babesa, edo hiriguneko eskubide osoko 10 kideren babesa.

Behin hautagaien zerrenda eskuan, prozesuak abiatuko du Geroa Baik. Karguren baterako zerrendaburu izateko hautagai bakarra aurkezten bada, bera izendatuko dute zerrendaburu. Hautagaitzak bat baino gehiago baldin badira, prozesuak abiatuko dituzte.

Lehendakaritzarako hautagaien kasuan, zerrendaren berri emango die Batzorde Iraunkorrak herriguneei, eta aukeraketa egiteko bilera egunak zehaztuko dizkie. Bilera horietan, modu presentzial eta sekretuan bozketak egingo dituzte. Hautagaiek aukera izango dute herriguneetan beraien hautagaitzak aurkezteko.

Antzeko prozedura egingo dute Iruñeko alkategaia aukeratzeko ere: Hiriguneko Koordinazio Mahaiak zerrenda jakinaraziko dio Hiriguneari, eta han egingo dute hautagaia aukeratzeko bozketa, mahaiak zehaztutako egun eta orduan. Hautagaiek aurkezpena egiteko aukera izango dute kasu horretan ere.

Ez dute jakinarazi noiz amaituko diren prozedurak.

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna