Donostiako 66. Zinemaldia

Alexander Payne izango da epaimahai ofizialeko burua

Rossy de Palma, Nahuel Perez Biscayart, Francesca Cima, Agnes Johansen eta Bet Rourichek osatuko dute mahaia.

Itziar Ugarte Irizar -

2018ko irailak 7

Jaialdiaren 66. aldia hasteko bi asteren faltan, epaimahai ofiziala aurkeztu du gaur Donostiako Zinemaldiak. Sei kidek osatuko dute: Alexander Payne zuzendari estatubatuarra izango da mahaiko presidentea, eta alboan izango ditu Rossy de Palma eta Nahuel Perez Biscayart aktoreak, Francesca Cima eta Agnes Johansen ekoizleak eta Bet Rourich argazki zuzendaria. Sail Ofizialean lehian izango diren filmen artetik Urrezko Maskorra nori eman hautatuko du seikoak.

Beste sailetako epaimahaiak ere argitu ditu Zinemaldiak. Zuzendari Berriak sailean, Katrin Pors (epaimahaiburua), Diego Lerman, Inma Merino, Nashen Moodley eta Lea Mysius izango dira epaimahaikideak; euskal zinemaren Irizar sarira Karmelo Vivanco ekoizleak (epaimahaiburua), Amaia Revuelta Donostia Kultura Zinema unitateko kideak eta Olga Cruz ile apaintzaileak erabakiko dute; eta Zabaltegi-Tabakalera saria Filipa Ramos idazle argentinarrak eta Santos Zunzunegi EHUko katedradunak aukeratuko dute.

Donostiara helduko diren aktoreen eta zuzendarien lehenengo izenak ere aurreratu dituzte gaur. Oraingoz, Juliette Binoche, Laetitia Casta, Timothee Chalamet, Ricardo Darin, Lily-Rose Depp, Ryan Gosling, Claire Foy, Mercedes Foran, Robert Pattinson eta John C. Reillyk baieztatu dute jaialdian izango direla.

Donostia Saria jasotzera etorriko dira, halaber, Judi Dench aktore britainiarra, Hirokazu Kore-eda zuzendari japoniarra eta Danny De Vito aktore, zuzendari eta ekoizle estatubatuarra.

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna