hezkuntza

Hezkuntza ministroarengana eraman du aldarrikapena Seaskak

Ez dute espero aurten irakasle gehiago lortzerik, baina, datozen urteetarako balioko duelakoan, borrokan segitzen dute Seaskakoek. Pauera joan dira ministroak parte hartu behar duen ekitaldi batera. Kide batek ministroarekin hitz egitea lortu du, eta bilera bat hitzeman dio hark.

Seaskako kideak, gaur, Pauen.
Seaskako kideak, gaur, Pauen. Eihartze Aramendia Iparragirre

Eihartze Aramendia Iparragirre -

2018ko irailak 8

Kasu, ikastola kexu leloa Pauera eraman du gaur Seaskak. Han, ekitaldi batean parte hartzekoa da Jean-Michel Blanquer Hezkuntza ministroa, eta beren eskaerak harenganaino iristea nahi dute.

Azoka bat inaguratzera joan da ministroa Pauera, eta hara sartzeko saioak egin dituzte Seaskako kideek. Poliziak ez zien utzi nahi, eta tentsio uneak izan dira. Nolanahi ere, Filipe Lazkarai Seaskako kideak lortu du Blanquerrekin hitz egitea, eta bilkura bat hitzeman dio. Bien bitartean, haren kabineteko kideekin bilduak dira Seaskako beste bi lagun.

Han da Eihartze Aramendia Iparragirre kazetaria.

Asteartean erabaki zuten Seaskako kideek gaur Pauera joatea. Seaskako ordezkariek eta Bordeleko Akademiako arduradunek bilera egin zuten egun horretan irakasleen aferari buruz, baina ez zen berritasunik izan: estatuak ez du postu gehiago onartuko. Ate hori itxita, bi bide jorratuko ditu Seaskak, Hur Gorostiaga zuzendariak aurreratu zuenez. Batetik, protestak gogortuko dituzte; eta, bestetik, ardura hartzeko eskatuko diete tokiko instituzioei. Hala, mobilizazioen arloan kokatzen da gaurkoa.

Izan ere, tentsioa areagotzen ari da Seaskako irakasle postuak direla eta. Gero eta ikasle gehiago dauzkate Lapurdiko, Nafarroa Behereko eta Zuberoako ikastolek, baina ez dizkiete onartzen haiei kasu egiteko adina irakasle. Iaz baino 230 ikasle gehiago dituzte aurten, eta Seaskak dio 25 irakasle behar dituela gorakada horri erantzuteko; ministerioak, berriz, bost postu eta erdi eman dizkio, eskatutakoen laurdenak ere ez.

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna

Izan zaitez BERRIAlaguna

Irakurtzen ari zaren edukia libre ematen jarraitu nahi dugu. Euskaraz informatzea da gure eginkizuna, zure eskubidea. Sareko irakurlea bazara, konprometitu zaitez irakurtzen ari zarenarekin. Geroa zugan.

Izan zaitez BERRIAlaguna