Politika

Batera-k kontu ikuskatze herritar bat abiatuko du Elkargoaren gobernantzari buruz

Hiru fasetan iraganen da, eta abendu erditsuan eginen dituzten jardunaldiekin bukatuko da. Euskal Elkargoko arduradunei proposamen zehatzak egiteko, herritarrak aktibatzea da helburua

Euskal Elkargoaren alde atera plataformak egindako protesta bat, 2016ko azaroan, Baionan
Euskal Elkargoaren alde atera plataformak egindako protesta bat, 2016ko azaroan, Baionan Isabelle Miquelestorena

Ekhi Erremundegi Beloki -

2018ko irailak 11

Euskal Elkargoa sortu eta urte eta erdira, haren gobernantzaz gogoeta bultzatzeko beharra ikusi du Batera plataformak. Oharturik azken hilabeteetan kritika eta desadostasun andana izan direla, herritarrak aktibatu nahi dituzte, ongi eta gaizki egiten direnak zerrendatu eta Euskal Elkargoko arduradunei proposamen zehatzak helarazteko. Hiru fase izanen ditu gogoeta prozesuak: ondoko asteetan, bilkura irekiak antolatuko dituzte herrietan, eta galdeketa bat zabalduko dute sareetan; azaro hastapenerako, galdera eta informazio saioak antolatuko dituzte elkargoko hautetsi eta adituekin; abendu erditsuan, berriz, jardunaldiak antolatuko dituzte.

"Azkenaldian kritika anitz entzuten dira; entzun behar dira", adierazi du Mixel Berhokoirigoin Batera plataformako kideak: aipatu ditu, besteak beste, hiriaren eta barnealdearen arteko "haustura", elkargoak ematen dituen "erantzun teknokratikoak", garai hartako hamar herri elkargoek tokian-tokian zituzten dinamiken "apaltzea", itun fiskala "hautsi" dela... Berhokoirigoinen iritziz, Ipar Euskal Herriaren ezagutza instituzionalaren kontrakoak "pozik" dira egoerarekin; "guk ez dugu joera hori elikatu nahi", gaineratu du. Orain arte azaleratu diren arrangura eta kexa guziak mahai gainean ezarri, eta proposamen zehatzak egiteko baliatu nahi dute.

Batera plataformakoek aitortu dute gogoeta "zaila" izan daitekeela, herritar anitzek ez dutelako funtzionamendu instituzionala ongi ezagutzen. Hala ere, beharrezkotzat jo dute herritarrak gaiari lotzea, batzuek "hurbiletik" segitzen diotelako, eta besteek informaziora heltzeko zailtasuna dutela azaleratzeko.

Elkargotik harago

Euskal Elkargoaren sorrera babestu bazuen ere, Batera-k beti erran du estatus bereziko lurralde elkargo bat hobesten duela Ipar Euskal Herriko egitura instituzional gisa. Jakes Bortairu Batera-ko kidearen arabera, gogoeta prozesuak horretara iristeko baldintza politikoak lortzen lagundu beharko luke. "Lehen esperientziarekin, arrazoi desberdinengatik gauzak korapilatzen badira, gaizki funtzionatzen badu, eta jendeak pentsatzen badu Ipar Euskal Herri mailako kudeaketa ez dela ideia ona, hobe dela maila apalago batean atxikitzea, herri elkargo txikietan... Ez badu interesik ikusten gauzak Ipar Euskal Herri mailan kudeatzeko, biziki zaila izanen da gobernu bati begira indar harreman bat sortu eta urrunago joatea. Funtzionamendua ez dute pertsonek soilik egiten, elkargoak baditu muga estrukturalak. Orain, batzuk agerian dira: horrek argumentua ematen digu urrunago joan behar dela errateko. Baina ez gaitezen eztabaidaz tronpa: arazoa ez da egitura Ipar Euskal Herri mailakoa dela".

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna