Merkataritza

Cecobik dio aurten "historikoa" izan daitekeela hurbileko saltokien itxiera kopurua

Bizkaiko merkatarien konfederazioaren ustez, kontsumitzaileen erosketa ohitura berriek eta online merkataritzak "arrisku larrian" jarri dituzte saltoki ertain eta txikiak.

Bilboko Zazpi Kaleak.
Bilboko Zazpi Kaleak. Aritz Loiola / FOKU

Irune Lasa -

2018ko irailak 11

Bizkaiko merkataritzak udan oro har izan dituen datu onak —urte arteko %0,6ko hazkundea salmentetan— ez dira saltoki ertain eta txikietara iritsi. Alderantziz, saltoki txikiek ekainean iazko epe berean baino %1,8 gutxiago saldu zuten. Eta joera hori ez da berria, Cecobi Bizkaiko merkataritza enpresarien konfederazioaren arabera; "otsailaz geroztik beherakada etengabea izan da".

Dendarien patronalaren ustez, "tokiko merkataritza laguntzeko neurririk hartzen ez bada, negozioen itxiera kopurua aurten historikoa izan daiteke", eta horrek "egoera korapilatsu eta etsigarrian" utziko lituzke enpresaburu, autonomo eta langileak.

Kontsumitzaileen erosketa ohitura berriak eta online salerosketak daude, patronalaren ustetan, saltoki txikien emaitza eskasen eta irauteko arrisku larriaren iturrian. "Berehalako neurriak" behar direla uste du Cecobik "hurbileko merkataritza salbatu nahi bada". 

Neurri horien artean egon beharko luke, besteak beste, merkealdi eta sustapenen politika ordenatu batek; saltoki ertain eta txikien arrakala digitala ere murriztu beharko litzateke eta sektorearen gaineko zerga sistema berrikusi, horrek, patronalaren ustez, "lehiakortasuna kentzen baitie saltoki txiki eta ertainei". Cecobik argi dauka: "Ekintza horiek lehentasun izan beharko lituzkete gobernu zentralak eta erkidegoetako eta tokiko administrazioek".

Horiez gainera, hiri barneko merkataritza "dinamizatzeko estrategiak" ere eskatu dizkie patronalak administrazioei. Cecobik beharrezko ikusten du, halaber, merkataritzako ETEn profesionalizaziorako estrategia bat, gabeziak dauden alorretarako formakuntza teorikoa eta praktikoa bilduko dituena. Adibidez, formakuntza hizkuntzetan, turista tokiko saltokietarako hurbiltzea errazteko xedez.

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna

Izan zaitez BERRIAlaguna

Irakurtzen ari zaren edukia libre ematen jarraitu nahi dugu. Euskaraz informatzea da gure eginkizuna, zure eskubidea. Sareko irakurlea bazara, konprometitu zaitez irakurtzen ari zarenarekin. Geroa zugan.

Izan zaitez BERRIAlaguna