FIJAIT fitxategiak

Urriaren 16an emanen du Baionako auzitegiak Peio Hirigoienen kontrako auziaren erabakia

Gaur arratsaldean epaitu dute euskal preso ohia FIJAITen izendatu ondotik ezarri zizkioten neurriei uko egiteagatik. Konstituzioaren kontrakoak direla salatu dute abokatuek. 800 euroko isuna eskatu du Baionako prokuradoreak. 150 pertsonak elkarretaratzea egin dute auzitegi aitzinean Hirigoieni sustengua erakusteko.

Elkarretaratzea egin dute auzitegiaren aurrean.
Elkarretaratzea egin dute auzitegiaren aurrean. @EkhiErremundegi

Ekhi Erremundegi Beloki -

2018ko irailak 11

Gaurko saioan aldeek beren argudioak eman ostean, epaimahaiak erabaki du ez bidaltzea Parisera auzia. Hala egin izan balu, Konstituzioaren aurkakoa den erabaki beharko zuen kasazio auzitegiak, gaur Hirigoienen defentsak salatu duen moduan, eta gaurkoa bertan behera geldituko zen. Azkenean, baina, Parisera ez bidaltzea erabaki dute, eta epaiketak aurrera segitu du, galdeketa eta lekukotasunekin.

Peio Hirigoienen kontrako auzia FIJAIT fitxategiaren kontrako epaiketa bilakatu nahi izan dute eta sei abokaturen defentsa izan du euskal preso ohiak. Fitxategiaren ondorioz ezarritako neurriek bere bizitza pertsonala eta familiarra oztopatzen dituztela salatu dute, eta lekukotasun ezberdinekin frogatu nahi izan dute neurriak zorrotzegiak direla eta euskal preso ohiei aplikatzeak ez duela zentzurik Euskal Herriko egoera politikoa kontuan hartuta. Samuel Vuelta Simon prokuradorearen arabera, FIJAITek ezarritako neurriak ez betetzeak Hirigoienen bergizarteratzeko borondate falta erakusten du, eta kontuan hartuta EH ez da salgai lelopean egindako etxebizitza espekulazioaren kontrako ekintza bortitzek segitzen dutela -ekintza horiek leporatuta egon zen preso Hirigoien-, arras justifikatua dela FIJAIT fitxategian sartzea. Gutxienez 800 euroko isuna ezartzeko eskatu dio epaileari. Urriaren 16an emanen dute erabakiaren berri.

FIJAIT  Arau hauste terroristen egileen Frantziako fitxategi judizial automatizatuko neurriak Frantziako Konstituzioaren kontrakoak direla argudiatu du Paulus Basurco abokatuak gaur epaiketaren lehen saioan, eta FIJAIT fitxategiaren helburuak gainditu direla azpimarratu du. Jokin Etxebarria euskal preso eta iheslari politiko ohien kolektiboko kideak epaiketa "onartezintzat" jo du, hura hasi aurretik egin duten elkarretaratzean: "Onartezina da ETAk jarduera armatua utzi, armagabetu eta erakundea desegin ondotik Frantziak gisa horretako neurriekin segitzea. Gatazkaren konponbidearen alde urratsak egiteko garaia da".

Epaiketaren berri zuzenean ematen ari da Ekhi Erremundegi Beloki BERRIAko kazetaria:

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna

Izan zaitez BERRIAlaguna

Irakurtzen ari zaren edukia libre ematen jarraitu nahi dugu. Euskaraz informatzea da gure eginkizuna, zure eskubidea. Sareko irakurlea bazara, konprometitu zaitez irakurtzen ari zarenarekin. Geroa zugan.

Izan zaitez BERRIAlaguna