Bihar Berrian

Puntako jatetxeen hornitzaileak

Kalitatezko lehengaiak eta produktuak dira goi mailako jatetxeetako errezeten ezinbesteko osagaiak; gertuko ekoizle txikiek hornitzen dituzte Arzak, Azurmendi, Mugaritz eta beste zenbait jatetxe. Haietako batzuk ezagutuko ditugu bihar 'Bizigiro' saileko gehigarrian.

Kepa Agirregoikoak ekoizten ditu Errotik behi esnekiak.
Kepa Agirregoikoak ekoizten ditu Errotik behi esnekiak. Luis Jauregialtzo / Foku

Izaro Zinkunegi Barandiaran -

2018ko irailak 14

Hendaiako (Lapurdi) Arruabarrena harategiak hornitzen ditu okelaz Mugaritz, Martin Berasategi eta beste zenbait jatetxe; aske hazitako animalien haragia du lehengai. Hernaniko (Gipuzkoa) Karabeleko ekonekazaritza etxaldeko lore eta kimuak dasta daitezke Arzak jatetxeko plateretan, baita Donostiako Oihaneder arrandegiko arrain freskoa ere. Errotik behi esnearekin egindako esnekiak ekoizten ditu Kepa Agirregoikoak Etxanon (Bizkaia); haren gazta onduak badu tokia Azurmendi jatetxeko sukaldean. Haien jarduna izango du ardatz bihar Bizigiro saileko gehigarriak.

Ekoizleez gain, Seaskak hamaseigarrenez antolatutako Gliss Eguna ere jorratuko du. Lerra kirolak ere euskal kirolak direla erakusteko ekitaldia da igandekoa. Aisialdian euskararen erabilpena bultzatzea ere badu xede. Horretarako, surfa, skimboard eta bestelako erakustaldiak egingo dituzte, baita euskarazko fitness saioa, haur txikientzat gimnastika gunea eta kontzertuak ere.

Zinemak ere izango du tartea gehigarrian, Gontzal Agoteren eskutik. David Kerrek zuzendutako Johnny English Strikes Again (2018) komedia filma izango du mintzagai. Rowan Atkinson aktoreak jokatzen du Maigret detektibearen rola, eta huraxe da pelikulako protagonista. Datorren astean estreinatuko da zinema aretoetan.

Azkenik, Irungo (Gipuzkoa) Ficoba erakustazokako Expogrow kalamu azoka ezagutuko dugu bertatik bertara. Asteburu osoan bisitatu ahal izango da landarearen inguruko azoka; postuak, jarduerak, kontzertuak, hitzaldiak eta abar egongo dira gaurtik igandera.

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna