Mikel Urdangarin musikariak eta Alain Urrutia margolariak goiz batean Skype bidez elkarrekin iandako elkarrizketa batean abiarazitako bidaia-kontakizuna. Aranzabalek dioenez, "bidaia bat da" filma. Musikari batek agertokitik kanpo bizitzen duenaren inguruan kontatutako bidaia.
Maluta Filmsek ekoitzi eta Aranzabalek zuzendu duen filmak BERRIAren laguntza du. Zinemiran lehiatuko da, Irizar saria eskuratzeko.
Zinemira euskal zinemari propio gordetako saila da, eta aurten hamabi film bilduko ditu. Ana Schulzen eta Cristobal Fernandezen Mudar la piel lanarekin inauguratuko dute saila eta Fermin Muguruzaren Black is Beltza animazio filma izango da klausuran; aurten lehen aldiz, eta euskal zinemari ikusgarritasun gehiago emateko asmoz, Kursaalean izango dira bi emanaldi horiek. Sail berean aurkeztuko dituzte hamabi lagunek zuzendu duten Gure oroitzapenak —Joseba Sarrionandiaren aurpegi ugariak jasotzen dituen hamabi piezako lana da—, eta Margolaria pelikula. Zinemiran erakutsiko dira, halaber, Izaro (Txuspo Poyo), Lady off (David Rodriguez Losadar), La noche nos lleva (David Gonzalez Rudiez), Errementari (Paul Urkijo), Gallo (Antonio Diaz Huerta), Kutxak (Juanmi Gutierrez), Basque selfie (Joaquin Calderon) eta Bajo la piel del lobo (Samuel Fuentes).
