Donostiako 66. Zinemaldia

Claire Denisek 'High Life' aurkeztu du lehiara

Robert Pattinson eta Juliette Binoche ditu protagonista zientzia fikziozko filmak.

'High life' filmeko protagonistak. /
'High life' filmeko protagonistak. / Juan Caros Ruiz/Foku

Mikel Lizarralde -

2018ko irailak 27

Aurretik beldurrezko generoa oso modu pertsonalean zuen landua Claire Denis zinemagile frantziarrak (Paris, 1946) Trouble Every Day filmean, baina gainerakoan, zinema errealistari lotua egon da haren zinema 1988an Chocolat bere lehen filma estreinatu zuenetik. Donostiako 66. Zinemaldian aurkeztu duen High Life filmarekin generoko zinemara itzuli da, oraingoan space-opera bat egiteko. Eguzkiaz haragoko espazioan dago kokatua filmak kontatzen duen istorioa, baina pelikulak berak gizakien arteko harremanei, pultsioei, indarkeriari eta desirei buruz hitz egiten du. Ez da hotz uzten duen filma, eta nabaritu zen atzo prentsarako emanaldian, eta nabaritu da gaur goizekoan ere.

Monte eta Willow alaba txikia espaziontzi batean daude, espazio zabalean. Bakarrik. Flashback batek, baina, egoera horren jatorria kontatuko dio ikusleari. Monte eta beste hainbat lagun zeuden ontzi horretan, guztiak ere Lurrean kondenatuak eta espaziora bidaliak, nolabaiteko akuri gisa. Haien arduradun, Dibs doktorea (Juliette Binoche), ugalketa esperimentuak egiten dituena beraiekin.

High Life Urrezko Maskorra irabazteko hautagaia da, eta lehiaketan dago Isaki Lacuestaren Entre dos aguas ere. Zinemagileak berak 2006an estreinatu zuen La leyenda del tiempo filmaren jarraipena da. 12:00etan emango dute filma Kursaalean.

 

 

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna