Iruñeko Udalak hainbat neurri hartuko ditu datozen egunetan, Nafarroako intsumisio mugimendua omentzeko. Batetik, kartzela zaharraren orubeari “Intsumisio parkea” izena jarriko diote; eta bestetik, mugimendu horren omenezko ekitaldi instituzionala eginen dute urriaren 6an.
Iruñeko alkate Joseba Asironek gaur goizean aurkeztu du egitasmoa, eta azaldu du, ekintza horiez gain, intsumisio mugimenduaren aldeko "adierazpen instituzional bateratua" ere sustatuko dutela. Adierazpena heldu den urriaren 4ko osoko bilkuran aurkeztuko dute.
Neurri horiek guztiak onartzeko, gehiengo nahikoa izanen du Iruñeko Udalak, horren aldeko hitzarmena izenpetu baitute EH Bildu, Geroa Bai, Aranzadi eta Ezkerra taldeek. Gaur elkarrekin egin dute agerraldia Joxe Abaurreak (EH Bildu), Itziar Gomezek (Geroa Bai), Manuel Millerak (Aranzadi) eta Edurne Eguinok (Ezkerra).
Alkateak gogorarazi du “2001eko abenduan deuseztatu zela nahitaezko zerbitzu militarra”, eta hori “indarkeriarik gabeko desobedientzia zibilaren lorpena” izan zela. “Nafarroan, intsumisioak bizitza politiko eta soziala asaldatu zuen, eta 1990eko hamarkadako protesta bakezale garrantzitsuena bihurtu zen. Jakina, errepresioa berehala etorri zen. Nafarroako milaka gaztek kartzela zigorrak jasan zituzten, desmilitarizatutako gizarte baten aldeko konpromisoagatik eta soldadutzaren aurkako desobedientzia mugimenduan aritzeagatik”.
Udalak gogora ekarri nahi ditu “gazte haiek, inoiz aintzatetsi ez zaien borroka, eta intsumisio mugimenduak Iruñeari egindako ekarpen historikoa”. Kartzela zaharreko orubea aukeratzerako aintzat hartu da han espetxeratuta egon zirela Nafarroako intsumiso gehienak eta “errepresio frankistaren biktimak, zeinek kartzela horretan jasan baitzituzten errepresioa, umiliazioa, tortura, exekuzioak, askatze faltsuak eta hamaika eskubide urraketa”.
Memoria historikoaren aitorpenaren ildo berean, Udala, AFFNA36 elkartearen eskaera aintzat hartuta, zenbait izapide egiten ari da kartzela zaharreko atea jatorrizko harriez berreraikitzeko.
Oroitarri bat Intsumisio parkean
Urriaren 6an egitekoa den omenaldi publikoan Pello Iraizoz artistak egindako monolito bat paratuko da. Monolito horren helburua izango da, alkatearen hitzetan, “etorkizuneko belaunaldiei gogoraraztea mugimendu horren eredugarritasuna eta Nafarroako gazteen lidergoa soldadutzari buru eman zion protestan”.
Ekitaldia 12:00etan hasiko da, eta intsumisio mugimenduaren protagonista eta sustatzaile izandakoak gonbidatuko dituzte parte hartzera.
