Reala 0-1 Valentzia

Anoetan irabazi ezinda

Reala Valentzia baino gutxiago izan da, eta 0-1 galdu du Valentziaren aurka. Willian Josek penalti bat huts egin du.

Kevin Gameiro Valentziako aurrelaria gola ospatzen.
Kevin Gameiro Valentziako aurrelaria gola ospatzen. Juan Herrero / EFE

Imanol Magro Eizmendi -

2018ko irailak 29

Merezita galdu du Realak Valentziaren aurka. Kontrarioak gehiago izan dira, eta bigarren zatian gol gehiago sartzeko hainbat aukera huts egin dituzte. Hala ere, txuri-urdinek eskura izan dute punturen bat urratzea, Willian Josek penaltia huts egin baitu 67.minutuan. Latok Pardori egin dio penaltia, eta Neto atezainak oinekin gelditu du aurrelari brasildarrak erdira eginiko jaurtiketa. Azken txanpan Realak gora egin du, baina nekea sumatu du eta Valentziak ondo kontrolatu du partida.

Asier Garitanok aldaketak egin ditu hamaikakoan. Moya atepean eta Illarramendi zelai erdian, biak hasieratik aritu da. Donostiako taldeak, dena den, ez du zorterik izan, Merinok hamabosgarren minutuan min hartu baitu. Realak jokoa sortzeko arazo handiak ditu eta gaur ere sumatu dira. Zelai erdiko borrokan Valentzia nagusi. Gola, halere, huts batean jaio da. Raul Navasek baloia galdu du eta Valentziak eraso bizia antolatu du. Cheryseven erdiraketa Gameirok bidali du sareetara.

Zalduak ere min hartu du, eta haren ordez Sandro irten da bigarren zatian. Garitanok eskema oldarkorrago bat zelairatu du, baina ez dio fruiturik eman. Lehen zatian bezala, Valentzia nagusi izan da zelai erdian, eta joko hori gabe Realeko aurrelariak baloi gose izan dira. Hala ere, penaltia eragin dute, partidaren norabidea alda zezakeen jokaldia, baina Willian Josek ez du asmatu.

Realak Anoeta berrituan jokatu duen hirugarren partida da eta garaipenik lortu gabe jarraizten du. Txuri-urdinak 11. dira sailkapenean eguneko beste emaitzen zain.

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna