euskal herria

Aberri Egun bateratua egitea proposatu du Independentistak sareak

Erabakitzeko eskubidean eta demokraziaren alde dauden eragile politiko eta sozial denei egin die datorren urtera begirako planteamendua.

Independentistak sarekoak, gaur, Euskal Herriko erdigune geografikoan.
Independentistak sarekoak, gaur, Euskal Herriko erdigune geografikoan.

Berria -

2018ko urriak 14

Proposamen bat egin du gaur Independentistak sareak, euskal erdigune geografikora egindako ibilaldiaren bukaeran: 2019an Aberri Egun "bateratua" egitea. "Gure herriaren etorkizuna erabakitzeko eskubidean eta demokrazian oinarrituta eraikitzearen alde dauden eragile politiko eta sozial guztiek bultzatutako Aberri Egun bateratua antolatzea proposatzen dugu", esan du. "Ziur gaude Euskal Herriaren gehiengoak eta diasporak ilusio handiz hartuko duela berria". Irañetako (Nafarroa) bordan egin dute ekitaldia.

Independentistak Sareak Aberri Eguna antolatu du azkeneko bederatzi urteetan, 2010etik aurten arte. "Alderdi eta familia politiko zehatzetatik harago, sentsibilitate desberdinetako herritarrak elkarrekin eroso parte hartzeko Aberri Eguna antolatzen saiatu gara. Orain, jauzi berri bat egiteko unea iritsi dela uste dugu".

Balizko burujabetza prozesu bati begira Aberri Egunak bere tokia eta bere papera izan beharko lukeela iritzi dio. "Diadak Kataluniako prozesuan duen garrantzia har dezakegu erreferentzia moduan. Ildo horretan datorren urteko Aberri Egunean urratsa egitea planteatzen dugu". Proposamena "politikaren plazan" utzi du. "Gaia hausnartzeko eskatzen diegu eragile desberdinei eta, datozen asteotan, guztiekin harremanetan jartzeko prest gaude".

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna