Arabako Probintzia Auzitegian berriro ekin diote gaur De Miguel auziko epaiketari. Iragan urriaren 1ean epaiketa beste hamabost egunez etetea erabaki zuen epaimahaiak, Arabako fiskalburuak eskatuta, Fiskaltzak eta defentsak zigorraren inguruko akordioa lortzeko lanean jarraitzeko. Goizean, saioa hasi aurretik, Josu Izagirre Arabako fiskal nagusiak iragarri du "tamalez" ez dela akordiorik lortu Fiskaltzaren eta akusatu nagusien artean, nahiz eta zenbait akusatuekin akordioa erdietsi duen. Akordio horren arabera, zenbait akusatuk onartu egingo dute fiskaltzaren tesi nagusia, hots, legez kanpoko komisioak kobratzeko sare bat egon zela eta haiek sare horren kide izan zirela. Izagirrek ez ditu eman akordio horri buruzko xehetasun gehiago, ezta akordioa norekin lortu duen ere.
Hala ere, Alfredo de Miguel akusatu nagusia akordiotik kanpo dagoela jakin da ahozko saioa hasi denean. Hain justu, gaur hasi dira deklaratzen De Miguel auziko akusatuak, eta saioa hasi bezain laster Alfredo de Miguelen abokatuak jakinarazi du bere defendatuak ez duela akordiorik erdietsi fiskalarekin eta hemendik aurrera soilik defentsaren galderak erantzungo dituela.
