atxiloketa

Karlos Apeztegia atxilotu du Guardia Zibilak

Hernanin atzeman dute, Etxerat-eko bulegotik irtetean. EH Bilduk atxiloketa salatu eta elkartasuna adierazi dio atxilotuari.

Karlos Apeztegia, 2013ko urrian.
Karlos Apeztegia, 2013ko urrian. Gorka Rubio / Foku

Berria -

2018ko urriak 16

Guardia Zibilak Karlos Apeztegia preso ohia atxilotu du eguerdian Hernanin (Gipuzkoa), Naiz.eus atariak jakinarazi duenez. Etxerat-ek herri horretan duen bulegoan egiten du lan, eta handik irtetean atzeman dute.

Poliziak senideei adierazi dienez, Auzitegi Nazionalaren aginduz atzeman dute, Lenteak operazioaren barruan. Intxaurrondoko kuartelera eraman dute aurrena, eta Madrilera eraman dute ondoren. Bihar igaroko da epailearen aurretik.

Espetxean zegoela funtzionarioen datuak ematen zituelako atzeman dute Apeztegia. Hala azaltzen da Frantziak Espainiari duela urtebete emandako txostenetan. Fiskalak esan du nahikoa zantzu badaudela atxilotuari talde armatuko kide izatearen delitua egozteko.

21 urteko espetxe zigorra bete ostean, 2013ko maiatzean askatu zuten.

Sorturen eta EH Bilduren salaketa

Apeztegiaren atxiloketa arbuiatu du Sortuk. Ohar batean, "mendeku gosez" jokatzea egotzi die Espainiako Gobernuari eta Guardia Zibilari: "Espainiako Gobernua eta Guardia Zibila tematuta daude jendeak kartzelaldia kosta ala kosta luzatzeko edo jendea berriro ere auzipetzeko."

Horretarako, "era guztietako trikimailuak" erabiltzea leporatu die: "Lehenago Parot doktrinarekin saiatu ziren, gero zigorrak ez metatzearekin; orain, berriz, mendeku gose amaiezinez, paper frantsesen kontuari heldu nahi diete. Edozein kartzelaldik ez ditu asetzen: Apeztegiaren kasuan 22 urte eman ditu kartzelan, baina ez omen da aski".

Apeztegia "lehenbailehen" aske uzteko eta "operazioak jarraipenik ez izateko" eskatu du: "PSOEren gobernuari exijitzen diogu gatazka konpontzeko enfoke politiko-judizial berria aplika dezala mendekua albo batera lagata".

EH Bilduko legebiltzarkide Julen Arzuagak, berriz, atxiloketa "iraganeko jazarpena" izan dela salatu du: "Guztiz gaindituta egon behar litzateke". Tolosan (Gipuzkoa) egin ditu adierazpenak Arzuagak, Lasa eta Zabalaren bahiketa eta hilketaren urteurrena gogoratzeko ekitaldian. Zenbait biktima "baztertuta" daudela salatu du legebiltzarkideak: "Horren kontra, ETAren biktimei eskaintzen diete egia, justizia, baina min gehiago ekarriz, operatibo polizial, judizial eta errepresiboak berriz ere ekarriz. Horren kontra agertu behar gara".

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna

Izan zaitez BERRIAlaguna

Irakurtzen ari zaren edukia libre ematen jarraitu nahi dugu. Euskaraz informatzea da gure eginkizuna, zure eskubidea. Sareko irakurlea bazara, konprometitu zaitez irakurtzen ari zarenarekin. Geroa zugan.

Izan zaitez BERRIAlaguna