HEZKUNTZA

Haurreskolak sarean bi ume edo gehiago izanez gero, matrikula bakarra ordaindu beharko da

Kuoten araudia aldatzea erabaki du Arabako, Bizkaiko eta Gipuzkoako haur eskolen sare publikoak. Urtarrilean sartuko dira indarrean neurriak.

Haur eskola bat.
Haur eskola bat. Jon Urbe/Foku

Garikoitz Goikoetxea -

2018ko urriak 18

Kontziliazioa bultzatzeko neurriak iragarri ditu Haurreskolak partzuergoak. Kuoten sisteman aldaketak egingo ditu. Batetik, erabaki du 18.000 euro baino txikiagoko diru sarrerak dituzten familiek ez dutela haur eskolaren kuota pagatu beharko; bestetik, Haurreskolak sarean aldi berean ume bat baino gehiago edukiz gero, matrikula bakarra pagatu beharko dute.

Cristina Uriarte Eusko Jaurlaritzako Hezkuntza sailburuak eman du neurrien berri. Adierazi du denera 600 bat familiak izango dutela neurri horien onura; partzuergoko ikasleen %13 inguru dira. Familien kopuruari erreparatuta, 500 bat dira 18.000 euroko errentara iristen ez direnak, eta haiek doakoa izango dute haur eskola. Nabarmen gutxiago dira aldi berean bi ume edo gehiago dituztenak Haurreskolak sarean: 80 bat.

Beste erabaki bat ere hartu du partzuergoak. Aurretiazko matrikula bat pagatu behar zuten orain arte gurasoek Haurreskolak sarean sartzeko: 91 euro. Bertan behera utzi dute hori.

Urtarrilean sartuko dira neurriak indarrean, eta jadanik matrikulatuta dauden umeei ere eragingo die. Uriartek jakinarazi du aurrekontu proiektuan txertatuko dutela asmoa —datorren astean du onartzekoa Eusko Jaurlaritzak—. Azkenean aurrekontuak onartuko ez balira parlamentuan, "beste formula batzuk" aztertuko lituzke gobernuak.

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna