azken ordukoa

Joan den astean Baionako ospitalean hil zen gazte baten senideek salatu dute taser pistolaren ondorioz hil zela

Euskal Irratiek senideen bitartez jakin dutenez, Poliziak barra elektrikoak baliatu zituen atxilotzeko unean, eta gazteak bihotzekoa izan zuen. Hiru egunez koman egon ondoren hil zen Bader Idrissi, larunbatean.

Baionako ospitalea. /
Baionako ospitalea. / Bob Edme

Berria -

2018ko urriak 18

Euskal Irratiek gaur arratsaldean jakinarazi dutenez, Poliziaren jardun txarraren ondorioz hil zen Urruñako (Lapurdi) gaztea. Gaztearen senideak Euskal Irratien egoitzan izan dira, eta azaldu dute atxilotu zutenean barra elektrikoak baliatu zituztela eta gazteak bihotzekoa izan zuela. Koman sartu zen horren ondorioz, eta handik hiru egunera hil zen, Baionako ospitalean.

Asteazken arratsaldean atxilotu zuen Poliziak Bader Idrissi. Euskal Irratien arabera, Pausua auzoko hainbat lekukok azaldu dute jokabide arraroa zuela. Xaia ostatuko Beñat Elizondok Euskal Irratietan azaldu duenez, farmazia batean izan zen aurrena, haren ostatuan gero, eta etxe batean azkenik. "Bere onetik aterata zegoen. Laguntza eskatzen aritu zen gehienbat". Auzoko bizitegi batera sartu ondoren, poliziak sartu ziren atzetik, eta atxilotzen saiatu. Barra elektrikoak erabili zituzten, eta horren ondorioz bihotzekoak jo zuela salatu dute senideek. Polizien jarrera ez ezik, sorosleena ere kritikatu dute, behar bezain azkar aritu ez zirelakoan.

Antza, osasun arazoak zituen gazteak, Baionako ospitaleko iturrien arabera.

Gertatutakoa salatzeko, manifestaziora deitu dute gaztearen senitartekoek eta lagunek, larunbaterako. 15:00etan aterako da ibilaldi isila, Pausutik, eta handik gertu dagoen polizia etxera joango dira.

Arma "ez-hilgarria"

Arma horiek 50.000 volteko deskarga elektrikoa botatzen dute, deskarga jasotzen duena zenbait denboraz geldi-geldi uzteko. Arma "ez-hilgarri" gisa kalifikatuta badago ere, AIk argitaratutako txosten baten arabera, AEBetako Poliziak gutxienez 500 pertsona hil ditu arma hori erabilita 2001 eta 2012 bitartean. Erresuma Batuan, azken hamar urteetan, ehundik gora pertsona hil dituzte horrelako armekin, hango gobernuz kanpoko erakundeek emandako datuen arabera. Besteak beste, Dalian Atkinson Realeko jokalari ohia hil zuen Ingalaterrako Poliziak taser pistola batekin, iazko abenduan.

Franziako Poliziak ez ezik, Ertzaintzak ere baditu pistola elektrikoak, 2017ko martxotik.

Audioa: Euskal Irratien albistea.

 

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna

Izan zaitez BERRIAlaguna

Irakurtzen ari zaren edukia libre ematen jarraitu nahi dugu. Euskaraz informatzea da gure eginkizuna, zure eskubidea. Sareko irakurlea bazara, konprometitu zaitez irakurtzen ari zarenarekin. Geroa zugan.

Izan zaitez BERRIAlaguna