GIZARTEA

Mauleko hiltegiko zuzendari ohia eta langileak zigortu dituzte

Gerard Clemente zuzendari ohia sei hilabeteko kartzela zigorrera kondenatu dute, gibelapenarekin. Langileei 80 eta 250 euro arteko isunak ezarri dizkiete.

Ekhi Erremundegi Beloki -

2018ko urriak 29

Gaur arratsaldean erori da epaia Paueko auzitegian. Errudun izendatu dituzte Mauleko hiltegiko zuzendari ohia eta langileak. Gerard Clemente zuzendari ohia sei hilabeteko kartzela zigorrera kondenatu dute, gibelapenarekin, "engainua" leporatuta -baldintza bilduma ez errespetatzea-. Langileei 80 eta 250 euro arteko isunak ezarri dizkiete, "beharrik gabeko tratu txarrak" leporatuta. Irailaren 17ko epaiketan prokuradoreak egin zituen eskaerak baino apalagoak dira zigorrak: auziperatuak diren hiru langileentzat 100 eta 400 euro arteko zigorra eskatu zuen, eta zuzendari ohiarentzat sei hilabeteko espetxe zigorra gibelapenarekin, eta 4.300 euro. Mauleko hiltegia bera, 50.000 euroko isuna ordaintzera zigortzeko eskatu zuen.

2016ko martxoan lehertu zen afera, L214 elkarte antiespezistak argitaratu zuen bideo sortaren ondorioz. Irudi gogorrak erakutsi zituzten; besteak beste, nola jotzen zituzten arkumeak eta txahalak behin eta berriz. Buruz behera ezartzen zituzten abereak hil baino lehen, eta arkumeak noraezean ageri ziren; haietako bat makina batek nola laurdenkatzen zuen ere ageri zen irudietan. Euskal Herritik kanpo, Frantzian ere eskandalua sortu zuen, eta Stephane Le Foll garai hartako Laborantza ministroak hiltegi guziak ikuskatzea galdetu zuen.

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna