2018ko hirugarren hiruhilekoan Arabako, Bizkaiko eta Gipuzkoako BPG %2,6 gehitu da aurreko urteko hiruhileko beraren aldean, Eustaten datuen arabera. 2018ko bigarren hiruhilekoaren aldean, hazkundea %0,5ekoa izan da. Urrian aurreratutako datuak berretsi ditu, beraz, eta baieztatu hazkunde erritmoa moteltzen ari dela. 2018ko bigarren hiruhilekoan %2,9koa baitzen hazkundea.
Industriaren ekarpen txikiagoak azaltzen du hazkundearen apaltzea. Hazkunde oso sendoko urteen ondoren (%4,2 2016an, eta %3,2 2017an), erorketa handia izan du udako hilabeteetan, %3,1etik %1,9ra, hain zuzen ere. Are gehiago, hiruhileko arteko tasan ez da igoerarik izan. Hori gertatzen den bigarren hiruhilekoa da.
Moteldu egin da zerbitzuen hazkunde erritmoa ere, baina askoz erritmo motelagoan: %3,1 lehen hiruhilekoan, %2,8 bigarrenean eta %2,7 hirugarrenean. Zerbitzuen barruan, administrazio publikoaren arloa da ahulena (%2,1), indartsuago baitaude merkataritza eta ostalaritza (%2,5) eta gainerako zerbitzuak (%3,2). Azken arlo horretan biltzen ditu Eustatek jarduera profesionalak, zientifikoak eta teknikoak, baita finantzarioak eta asegurukoak ere.
Bilakaera hobea erakusten du azken hamarkadako sektore ahulenak, eraikuntzakoak, hazkunde erritmoa bizitzen ari delako: %2,7 urte hasieran, %4,1 bigarren hiruhilekoan eta %4,8 hirugarrenean.
Lehen sektoreak, ohiko gorabeherekin jarraitzen du. Iaz baino %4,6 ekarpen txikiagoa egin dio BPGari.
Lurraldeei erreparatuz gero, urte arteko hazkunde tasa handiena Arabak eta Gipuzkoak dute (%2,8), eta txikiena, berriz, Bizkaiak (%2,4).
Lurraldeka
Hazkundea moteldu arren, enpleguaren bilakaera sendoak jarraitzen du. Eustatek dedikazio osoko baliokidetzan neurtzen ditu, eta ziurtatu du duela urtebete baino %2 lanpostu gehiago daudela orain, eta aurreko hiruhilekoan baino %0,4 gehiago. Kasu horretan, industriaren ekarpena ez da txarra (%1,8), aurreko hiruhilekotakoari eusten diolako. Haren gainetik daude zerbitzuak (%1,9) eta eraikuntza (%1,9).
Enpleguak gora egin du hiru lurraldeetan: Araban %2,2 hazi da, Gipuzkoan %2,1 eta Bizkaian %1,8.
