'Gaztelueta auzia'

Ikastetxeko zuzendariak epaia gaitzetsi du, eta ikasle ohiaren lekukotza auzitan ipini

Esan du "kontsaesanez betetako kontakizun bat" izan dela irakasle ohia zigortzeko "froga bakarra".

Aritz Loiola / Foku

Ibai Maruri Bilbao -

2018ko azaroak 29

Leioako (Bizkaia) Gazteluetako zuzendari Imanol Goiarrolak haserrea agertu du goizean ikastetxean bertan egin duen agerraldian. Tonuan eta aurpegikeran nabaritzen zitzaion tentsioa.  "Ez dut epaia onartu beste erremediorik, baina argi geratu dadila ez dudala harekin bat egiten. Are gehiago: uste dut bidegabekeria bat egin dela". Esan du "harrituta" dagoela abusuak sufritu zituen gaztearen lekukotza hartu delako froga bakar modura. "Ezin dut sinetsi kontraesanez betetako lekukotza bat nahikoa izatea pertsona bati 11 urteko zigorra ezartzeko". Honela laburbildu du epaia: "Ikasleak dioen guztia egia da, eta kontrakoa dioena gezurretan dabil". Berak epaiketan egindako adierazpenak manipualtu direla ere salatu du. 

Aitortu du perituek sinesgarritasuna eman diotela gaztearen lekukotzari. "Baina egia bada, osoa izango da egia. Eta kontakizunaren zati bat ez da egia, gertaera horiek publikoan gertatu zirelako, eta lekukoek gezurtatu egin dutelako. Lekukorik egon ez  eta ezkutuan gertatu den hori egia dela sinetsi behar dugu?". Ikastetxearen jarduna defendatu du. Esan du hasieratik gurasoekin komunikazio zuzena izan zutela. "Baina ezin nuen kondenatu frogarik gabe". 

Goiarrola ere biktimaren tutore izan zen; justu zigortutako irakaslea izan aurreko bi ikasturteetan. "Askotan pentsatzen dut neu izan nintzekeela abusuak leporatu dizkioten irakaslea. Babesgabe sentitzen gara irakasleak". Zigortua ia beste ehun ikasleren tutore izan zela ere azpimarratu du: "Beti esaten da predatzaile sexualek biktima bat baino gehiago izaten dituztela. Kasu honetan guztiei galdetu diegu eta denek irakaslearen oso balorazio ona egin dute". 

Irakasleekin eta biktimaren ikaskide ohiekin hitz egitera animatu ditu kazetariak. "Ikertu zeuok ea egia den epaiak dioena". Abusuak gertatu ziren bulegoa ikustera gonbidatu ditu kazetariak. "Epaileak sekula ez dira etorri. Hezkuntzako ikuskaria etorri zen, eta epaiketan argi esan zuen bere ustez bulego honetan abusuak egin izana sinesgaitza dela". Abusuak salatu zirenetik ikastetxeko ateetan leihotxoak zabaldu dituzte; baita bulego hartan ere.

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna