Gizartea hobetzeko egindako lana eskertzea izan ohi du helburu Nafarroako Gobernuak urtero eman ohi duen urrezko dominak. Aurten Saray Bularreko Minbiziaren Nafarroako Elkarteak jaso du saria, "lan eredugarria egiten dutelako bai elkartasunaren alorrean eta bai osasunarenean ere".
Uxue Barkos lehendakariak goraipatu egin du osasun langileek bularreko minbiziaren arloan egindako lana, bai eta duela 22 urte elkartearen sorrera ahalbidetu zutenena ere. "Nafarroako gizarteak eskertzen du elkarte honek sentimenduak kudeatzeko egiten duen ahalegina".
Aurrez, Nafarroako Erresuma omendu dute artxibategiaren aurrean. Lore eskaintza baliatu du Barkosek xenofobiaren gorakadari buruz ohartarazteko: "Europan eta Atlantikoaren beste aldean bizi duten uhin xenofoboa ez da arrotza gurean. Gure esku dago demokraziak eskaintzen dizkigun armak haren aurka borrokatzeko erabiltzea".
