Politika

Bihartik, Jaurlaritzak kudeatuko du Arabatik Burgosera arteko AP-1eko zatia

Transferentzien Batzorde Mistoan lortutako akordioari esker, sei kilometroko errepide tartearen titulartasuna eskuratuko du Jaurlaritzak bihar. 2019ko lehen seihilekoan, berriz, Arabako Foru Aldundiaren esku geratuko da haren kudeaketa.

Armiñongo ordainlekua.
Armiñongo ordainlekua. Juanan Ruiz/Foku.

Edurne Begiristain -

2018ko abenduak 4

Joan den azaroaren 20an, bilera egin zuen Transferentzien Batzorde Mistoak, eta, han, Jaurlaritzako eta Espainiako Gobernuko ordezkariek akordiorako oinarri bat lortu zuten bi eskumenen inguruan; horren arabera, Jaurlaritzaren esku geratuko ziren Armiñon (Araba) eta Burgos (Espainia) arteko AP-1 errepideko zatia (sei kilometro) eta bi trenbide: Basurtutik Arizerakoa (7,8 kilometro) eta Irauregi-Lutxana-Barakaldo artekoa (5,7 kilometro). AP-1eko zatiari dagokion eskumena bihartik aurrera geratuko da behin betiko Eusko Jaurlaritzaren esku, Estatuko Aldizkari Ofizialean eta Euskal Herriko agintaritzaren Aldizkarian argitaratu ostean. Bi trenbideei dagokien eskumena, berriz, datorren astean geratuko da Jaurlaritzaren esku.

Eusko Jaurlaritzak ohar batean jakinarazi duenez, hemendik aurrera Kupotik deskontatuko du eskumen horren kopurua. Zehazki, Jaurlaritzak Espainiako Gobernuari ordaindu beharreko Kupotik 287.875 euro deskontatuko ditu urtero.

AP-1 autobidearen zati hori Itinere enpresak kudeatu du orain arte. 84,3 kilometro ditu, eta horietatik ia sei kilometro Araban daude. Espainiako Gobernua da azpiegituraren jabe egun, baina bihartik aurrera, transferentzia eskualdatuta egongo denez, Arabako Foru Aldundiaren errepide sarearen barruan sartuko da. Jaurlaritzak 2019ko lehen seihilekoan utziko du Arabako diputazioaren esku errepide zati horren kudeaketa.

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna