Durangoko 53. Azoka

"Sinistuko dugu bagarela?"

Zabaldu ditu ateak Durangoko 53. Azokak. Berrikuntza ugarirekin dator; izan ere, lehen Sormen beka norentzat izango den jakinaraziko dute bihar. Sarrera ekitaldian, jende ugari bildu da Areto Nagusian, antolatzaile eta ordezkariei entzuteko prest. Albistearen amaieran, irekieraren bideoa.

Durangoko Azokaren irekiera ekitaldia
Durangoko Azokaren irekiera ekitaldia Ane Ubegun Goikoetxea

Berria -

2018ko abenduak 5

Urtero bezala, ikasleak eta komunikabideak izan dira Durangoko Azokako ateak zeharkatzen lehenak. Aurrez prestaketa lanak izan dira nagusi. Izan ere, asko dira prestatu beharreko xehetasunak bost egunez iraungo duen azokan dena espero moduan atera dadin.

Inaugurazio ekitaldia 19:00etan izan da Txakur Gorria sormen kolektiboaren eskutik. "Gure kontraesan guztiekin. Sinistuko dugu bagarela?" galdetuz bukatu dute ekitaldia, atzean mural bat egiten zuten bitartean. Durangoko alkate Aitziber Irigorasek hitz egin du lehenengo: azoka aniztasunaren eta sormenaren isla dela azpimarratu du, eta antolatzaileei eskerrak eman dizkie, azoka antolatzeko egiten duten esfortzuagatik. Ondoren, Bizkaiko Foru Aldundiko Ana de Castro Euskarako zuzendariak hartu du hitza: "Durangoko Azoka liburu azoka bat baino askoz gehiago da". De Castrok eskerrak eman dizkie udalari eta antolatzaileei, eta elkarte publiko eta pribatuen arteko elkarlana "ezinbestekoa" dela adierazi du.

Bingen Zupiria Eusko Jaurlaritzako Kultura eta Hizkuntza Politikako Sailburuak ere hitz egin du: "Gizarte aurreratu honi interesa nola piztu pentsatu behar dugu". Bukatzeko, herritarren interesa sustatuko duten proiektuak sortu behar direla azaldu du. Nerea Mujika Gerediaga Elkarteko zuzendariak esan du DA! bizitzeko modu asko daudela, eta horregatik, Durangoko Azoka, aldi berean, azoka asko direla: "Hitzen bueltan ibiliko gara, eta musikaren inguruan topatuko dugu elkar. Arte eszenikoekin aberastuko gara, kultura digitalean murgildu eta ikus-entzunezkoekin amestuko dugu".

Aurretik, ordea, hainbat lan ezagutzeko aukera izango dute hara biltzen direnek: besteak beste, Javier Sagarzazuren eta Miren Aierberen Hondarribia. Ñabarduren hiria, edota Josune Albisuren, Jone MIren Hernandezen eta Garbiñe Mendizabalen Non dago MIkel Laboa? dokumentala.

Iazko aurrekontu antzekoa izango du Durangoko Azokak aurtengoan: 659.912 euro izango da. Orotara, 247 erakusmahai bilduko ditu Landako guneak, eta berrehun kultur ekitaldi inguru izango dira. Esaterako, Telmo Esnalen Dantza dokumentalean oinarrituta ondu duten dokumental sailaren lehen atala eta Koldo Almandozen Oreina ardatz hartuta landu dituzten hiru film labur.

Ateak ireki arteko tartean urduritasun eta ilusioa izan dira nagusi Gerediaga Elkartean ere. Erronka berriei eurre egiteko prest da Nerea Mujika lehendakaria ere: "Etapa berri baten hasiera dela iruditzen zait, eta emozio berezia dut horregatik".

 

 

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna

Izan zaitez BERRIAlaguna

Irakurtzen ari zaren edukia libre ematen jarraitu nahi dugu. Euskaraz informatzea da gure eginkizuna, zure eskubidea. Sareko irakurlea bazara, konprometitu zaitez irakurtzen ari zarenarekin. Geroa zugan.

Izan zaitez BERRIAlaguna