Futbola

Aitor Elizegi, Athleticeko presidente berria

85 botoko aldea atera dio Alberto Uribe-Etxeberriari, faboritotzat jotzen zen hautagaiari. Bazkideak eta Lezama kokatu ditu klubaren geroaren erdigunean.

Ainara Arratibel Gascon -

2018ko abenduak 27

Inoiz baino estuago, Ibaiganek maizter berria dauka: Aitor Elizegi sukaldaria (Bilbo, 1966). Athleticeko bazkideek aldaketaren alde egin dute, Elizegiren hautagaitzaren alde eginez. Aurkeztu edo ez aurkeztu ibili eta gero, ezustea eman du. Izan ere, Alberto Uribe-Etxeberriaren hautagaitza jotzen zen faboritotzat, segidaren hautagaitza. Orain, Elizegik sukaldari ibilbidean erabili dituen osagai eta errezetak aplikatu nahi ditu klub zuri-gorria gidatzeko. Athleticeko historiako 32. presidentea izango da.
Egun osoan, etengabea izan zen bazkideen joan-etorria. Mazarredo kalean ilara luzeak osatu ziren tarte batzuetan. Giro onean egin zen bozketa. 19.060 bazkidek eman zuten boza atzo, deituta zeudenen %46ak. Hauteskundeak izan ziren aurreko aldian baino 2.000 bat gutxiago da hori, nahiz eta bazkide gehiago zeuden deituta bozkatzera. Oso estu joan zen kontaketa. Aitor Elizegik 9.179 boto (%47,9) jaso zituen, eta Alberto Uribe Etxebarriak 9.264 (%47,46).
Elizegik 30 urte baino gehiago daramatza bazkide gisa, eta, batez ere, sukaldaritza munduan egindako lanagatik da ezaguna. Ez da euskal hiztuna.Bilbao Dendak-eko presidentea da, eta Gaminiz Bascook, Slow Cook Txocook, KIuring Club, Bascook eta Basquery jatetxeko burua izan da. Orain, sukaldea alde batera utzi, eta Ibaiganeko bulegoa izango du lantoki. Dena den, gutxienez 2019ra bitarte, Bilbao Dendakeko presidente segituko du. «Ez dut nahi jendeak pentsatzea gauza bat bestearekin aldatzen dudanik. Izan ere, ezin da Bilborik izan Athletic gabe, baina ezta dendarik eta merkataritzarik gabe ere».
2007an, Juan Carlos Erkorekaren hautagaitzako kide izan zen. Baina, azkenean, Fernando Garcia Macua gailendu zen hauteskunde haietan. Aurkezteko zalantzak izan zituen oraingo honetan, eta, baiezkoa eman eta gero, atzera egin zuen, baina hurrengo egunean urratsa egin zuen. Prest ikusten du bere buruari gaurtik aurrera izango duen erronkari heltzeko: prest dago orain presidente izateko erronkari heltzeko: «Garai aproposa da: fresko eta sasoiko ikusten dut neure burua, eta lantalde ezin hobeak inguratuta».
Hain zuzen ere, Elizegi kritiko agertu zen Urrutiaren zuzendaritzak ezarritako hauteskunde datarekin: «Are gehiago, taldearen kirol egoera kontuan hartuta. Gainera, bi hautagaiak ez gara berdintasunean lehiatu, guk diru bermea jarri behar izan dugulako». Alde horretatik, argitasuna agindu du Elizegik, eta gaur bertan jakinaraziko du hurrengo hauteskundeen data, baina aurreratua du 2022ko uztailean izango direla.
Gaizka Garitanok aulkian segitzaren alde azaldu da, eta, Uribe-Etxeberriak ez bezala, Elizegik hauteskunde kanpainan jakinarazi zituen bere lantaldean kirol esparruko ardura izango dutenen izenak. Hemendik aurrera, Rafa Alkortak eta Andoni Aiertzak jokalari ohiek gidatuko dute esparru hori, eta Manolo Garcia Meco  prestatzaile fisiko ohia izango dute kanpo aholkulari gisa. Bi lan esparru nagusitan ariko dira: harrobiko taldeei jarraipena eginez, batetik, eta Lezamatik kanpoko jokalariak ikuskatuz, bestetik. Aiertzak argi utzi zuen hauteskunde kanpainan zein izango duten erronka: «Lezama futbolariak prestatzeko Europako lantegirik onena izatea nahi dugu». Emakumeen taldeak, gainera, kirol zuzendari bat izango du: «Eskarmentu handikoa, bai hemen eta bai atzerrian». Hor, ordea, ez zuen izenik eman, eta ikusi beharko da datozen egunetan argitzen den.
Urtarrilaren 1ean irekiko da berriro ere fitxaketak egin ahal izateko merkatua, eta Fernando Llorenteren, Ibai Gomezen edo Ander Herraren itzuleraren inguruan behin baino gehiagotan galdetu zitzaion hauteskunde kanpainan Elizegiri. Gaurtik aurrera presidente denak argi dauka: «Gu prest gaude hitz egiteko Atheticera itzuli nahi duela argi eta garbi esaten duen edozein jokalarirekin».
Animazio gunea
Uribe-Etxebarriaren antzera, egoki ikusten du jokalariek etete klausularik ez edukitzea. «Abiapuntu ona da». Dena den, ez du egoki ikusi Urrutiaren zuzendaritzak azken unean hartu izana neurri hori: «Ez dugu ulertzen halako kontratu bat hiru jokalarik soilik edukitzea ere. Gure ustez, jokalari guztien artean zabaldu behar da».
Kirol arlotik harago, arlo soziala indartzeko asmoa du Elizegik.  Hori izan da haren hautagaitzaren zutarri nagusia, eta, aurreratu zuenez, agintaldiaren muinetako bat izango da. «Bazkideak kokatuko ditugu horren erdigunean».  Hala, asmo argi bat du: 3.000 zalez osatutako animazio gune bat sortzea: «San Mames zaharrean zegoen giroa berreskuratu nahi dugu, eta animazio gune hori Europan erreferente izatea». Gune horretan gazteak kokatzea nahi du. Horrekin batera, Bikain bazkidea izeneko figura sortuko du, eta, bazkide urteak kontuan hartuta, abantaila batzuk izango dira. Klubaren inguruko erabakietan bazkideek pisu handiagoa izango dute, estatutuak aldatuz.
Ekonomikoki Athleticek inbertsio eta finantzaketa gaitasun handiagoa izateko lan egingo du, eta nazioartean haren ikurra indartzeko.