Goizeko bederatziak jotzerako iritsi da Proactiva Open Arms gobernuz kanpoko erakundearen ontzia Espainiako kostara. Mediterraneoan erreskatutako 311 migratzaile zeramatzan, eta Cadizko (Andaluzia) Crinavis portuan lehorreratu da azkenean. Aurrez, Italiari eta Maltari ere eskatu zioten haien lurretan sartzeko baimena, baina ukatu egin zioten. Open Arms ontziko arduradunek joan den astean baieztatu zuten Madrilek ez ziela trabarik jarriko.
Itsasoan erreskatatu dituzten migratzaileetatik, adingabeak dira gehienak: 179. Oinarrizko laguntza jaso ondoren, inguruko zentroetan sartuko dituzte. Atzerritarren behin-behineko harrera zentroa abuztuan ireki zuten Crinavis portuan, eta 9.000 migratzaileri baino gehiagori egin die harrera geroztik —%15 inguru, helduen laguntzarik ez zuten adingabeak—.
Aurten, lehen aldiz, migratzaile gehiago iritsi dira Espainiara Italiara baino, nahiz eta, oro har, behera egiten ari den kopurua. IOM Nazioarteko Migrazio Erakundearen datuen arabera, uztailera arte 18.061 errefuxiatu iritsi ziren aurten Espainiako portuetara; haietatik 10.000, ekainean. 2017an, berriz, 6.500 migratzaile lehorreratu ziren Espainiako portuetan. Italian, berriz, alderantzizko joera izan dute: aurten, uztailera arte,17.827 pertsona iritsi dira Italiara, eta iaz, 93.237.
Lehorrera iristeko ahaleginean, 2.381 migratzaile hil ziren itsasoan 2017an. Munduko itsasoetan hildako migratzaileen erdiak baino gehiago dira.