Gaztetxearen ordezkariek jakinarazi dute abenduaren 26an udaltzainen bisita jaso zutela. Eusko Jaurlaritzak eskatuta, Donostiako Udalak presazko izapideak hasi zituen, gaztetxea husteko. Bost eguneko epea utzi zieten, helegiteak aurkezteko. Gaztetxea edozein momentutan husteko arriskuan dagoela esan dute.
Ostegun honetan prentsaurrekoa egin dute dozenaka lagunek, udaletxearen atarian. Azaldu dute helegiteak aurkeztu dituztela, baina ez zaiela zentzuzkoa iruditzen hamabi urtez itxita eta utzita egon den eraikin bat husteko orain halako "presa" edukitzea.
Helegiteak aurkeztu badituzte ere, udalak erantzun egokirik emango dien esperantzarik ez dutela adierazi dute, eta "erresistentzia" egiteko prest daudela ohartarazi; horretarako txandak antolatzen hasi dira. Ostiral honetan, 19:00etan, manifestazio bat ere egingo dute, Plaza Berritik abiatuta.
Irail hasieran, Parte Zaharreko Kapandegi kaleko eraikin bat okupatu zuen Parte Zaharreko Gazte Asanbladak. Kijera izena jarri zioten gaztetxeari, 1979an Espainiako Poliziak tiroz hil zuen gaztearen omenez —Iñaki Kijera deitzen zen—. Urte askoan Orixe ikastolarena izan zen eraikin hori, baina hamarkada oso bat itxita zeraman.
Liburutegia, jantokia, umeek jostatzeko gela bat, bilerak egiteko lekuak... antolatu dituzte hilabeteotan, eta auzoari bizitza eman diotela argudiatu dute gazteek. "Sortu diren eta sortzeko bidean dauden proiektu hauek guztiek beharrezkoa dute espazio hau, eta horregatik ez gara hemendik mugituko. Kijera gure etxea bihurtu da, gure esperantzak eta ametsak egia bihurtzeko espazioa bihurtu da, mundu berria eraikitzeko beharrezko tresna".