'Eta gertatu izan balitz?' filma BERRIAren webgunean

Eta 2003 hartan Guardia Zibila Arantzazun sartu izan balitz? Galdera hori oinarri hartuta, film labur bat egin du Khuruts Begoña zuzendariak. Donostiako Kresala zineklubean emango dute otsailean.

Arantxa Elizegi Egilegor -

2019ko urtarrilak 4

Buruan zebilkien Arantzazuri buruzko zerbait egitea, baina ideia argirik ez. BERRIAn Guardia Zibilak Arantzazun egitekoa zuen operazioari buruz irakurri zuen arte. Izan ere, Euskaldunon Egunkaria itxi eta lau egunera santutegira abiatu ziren Espainiako segurtasun indarrak. Operazioaren helburua zein zen ez zen inoiz argitu, ez baitzen burutu. Bide erdian zirela dei bat jaso, eta dena bertan behera utzi zuten.

Zer gertatuko zen, ordea, Guardia Zibila euskararen eta euskal kulturaren ikur bilakatu den egoitzan sartu izan balitz? Galdera horri balizko erantzun bat ematen saiatzen dira filmean Euskaldunon Egunkaria-ko zuzendari Martxelo Otamendi eta Jakin-eko buru Lorea Agirre. Baina bada hirugarren hipotesi bat ere, Khuruts Begoña zuzendariarena berarena. "Zergatik da Arantzazu garrantzitsua euskal kulturarentzat? Ez da soilik han gertatu diren gauzengatik, baita haren estetikarengatik ere. Han daude Oteizaren eskulturak ere, hamalau urtez bide bazterrean botata egon zirenak...".

Erabakia hartuta, esku artean zituzten gainontzeko proiektuak albo batera utzi, eta lanean hasi ziren. "Gidoia ez geneukan erabat itxita. Argi genuen Martxelok eta Loreak agertu behar zutela, baina baita beste pertsonaia bat behar genuela ere. Hirugarren hura haien esandakoetatik atera genuen, nolabait", azaldu du Begoñak.

Pozik dago lortutako emaitzarekin: "Film laburra esaten duzunean, jendeak zortzi bat minutuko zerbait espero du, baina honek baditu hamasei eta gainera nahiko abstraktua da. Hori guztia kontuan izanik jendeak azkarra dela esaten dizunean pozgarria da".

Abenduan estreinatu zuten filma, Bilbao Arte fundazioan. Donostian ere hitzartua dute emanaldi bat: otsailaren 25ean izango da, Kresala zineklubean.

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna

Izan zaitez BERRIAlaguna

Irakurtzen ari zaren edukia libre ematen jarraitu nahi dugu. Euskaraz informatzea da gure eginkizuna, zure eskubidea. Sareko irakurlea bazara, konprometitu zaitez irakurtzen ari zarenarekin. Geroa zugan.

Izan zaitez BERRIAlaguna