Bidaiari gutxien izaten diren asteak baliatuko dituzte Miarritzeko aireportua ixteko. Otsailaren 3 gauean itxiko dute, igandearekin, eta martxoaren 4an irekiko dute, astelehenarekin. Denbora tarte horretan zabalik egongo dira aireportuko aparkalekua, autobus geltokiak eta autoak alokatzeko lekuak, baina hegazkinik ez da izango.
Aireportuko arduradunek azaldu dute hegazkinen segurtasuna areagotzeko obrak egingo dituztela pistan.
Uste izatekoa da gorabehera asko sortuko dituela aireportua itxita egoteak: joan den otsailean, adibidez, 60.000 bidaiari baino gehiago igaro ziren Miarritzeko aireportutik.
Parisko hegaldien kasuan, autobus zerbitzua jarriko du Air France konpainiak. Pariserako joan-etorria Paueko aireportuaren bidez egingo dute, eta bidaiariek doako autobusa izango dute Miarritze eta Paue artean.
