Grafiko interaktiboa

Nondik igaroko da Korrika?

21. Korrikaren ibilbidea aurkeztu du AEK-k. BERRIAk mapa interaktibo bat prestatu du ibilbidea osorik azaltzeko; herriz herriko ibilbidea kontsulta daiteke horren bidez.

Garikoitz Goikoetxea -

2019ko urtarrilak 13

Prestatu dute 21. Korrikaren ibilbidea: 11 egun, zazpi herrialde, 2.560 kilometro. Klika leloarekin egingo dute Korrika aurten: Euskaraldia igaro berri delarik, euskararen aldeko jokabideak hartzera dei egingo du Korrikak, euskararen alde Klika egitera. Apirilean izango da 21. Korrika: Garesen (Nafarroa) abiatuko da, hilaren 4an, ostegunarekin, eta Gasteizen bukatuko, hilaren 14an, igandean. 21.

Ibilbidearen berri eman du AEK-k, eta mapa interaktibo bat osatu du BERRIAk. Hona gako nagusiak:

Apirilak 4, osteguna. 17:00ak aldera abiatuko da Korrika. Ekitaldi bat egingo dute aurretik, eta amaieran irakurriko duten mezua sartuko dute lekuko barruan. Garestik abiatuta, Lizarrarantz joko du Korrikak, eta 19:30erako iritsiko da Lizarrara. Lodosatik barrena (23:30), Erribera aldera hartuko du.

Apirilak 5, ostirala. Erriberan izango da bigarren egunean: Tuteran, 08:30 aurretik. Cascanteraino iritsiko da, eta Tuteratik. Arratsaldean Nafarroa erdialdera iritsiko da Korrika: adibidez, Erriberrira (16:20) eta Tafallara (17:05). Ekialdera joko du handik: ostiral gauean, 22:30ean, Zangozan izango da. Zaraitzu aldean igaroko du gaua.

Apirilak 6, larunbata. Hirugarren egunean, goizean Agoitz aldean ibiliko da, eta bazkalondoan arrimatuko da Iruñera: Mendillorri auzoan izango da 14:20an. Iruñe alboko herrietan sartu-irtenean ibiliko da ondoren. Hiriburuko alde zaharrean 17:00ak aldera sartuko da. Ekialderantz hartuko du handik, Nafarroa Behererantz (Orreaga, 23:45).

Apirilak 7, igandea. Gauean igaroko du Nafarroa Behereko hiriburua, Donibane Garazi: 02:40an. Zuberoara joko du gero, eta goizean goiz iritsiko da Maulera, 07:10ean. Lapurdira joko du arratsaldean: 17:50 aldera Baionan izango da Korrika, eta segidan igaroko ditu Angelu (19:00) eta Miarritze (19:45). Kostaldeko herrietatik joko du Gipuzkoa alderantz.

Apirilak 8, astelehena. 01:30ean sartuko da Korrika Gipuzkoara, Irundik, baina berehala hartuko du Nafarroara, Bortzirietara (Bera, 02:50). Lapurdira joko du handik, eta Azkainen izango da astelehen goizean, 08:00etan. Lapurditik Nafarroa aldera berriz, Baztandik: Elizondon izango da 13:20 aldera. Malerrekatik (Doneztebe, 15:00), Leitzaldetik (Leitza, 18:00) eta Basaburutik (Jauntsarats, 21:15) igaroko da arratsaldean.

Apirilak 9, asteartea. Sakanan pasatuko da goizaldean (Altsasu, 04:45), eta Arabara sartuko da goizean: Agurainera iritsiko da 08:00etarako. Kanpezu aldean izango da eguerdian (13:00), eta arratsaldean, Arabako Errioxan (Guardia, 16:55); gauean, Trebiñun (22:15).

Apirilak 10, asteazkena. Goizaldean Aiaraldean ibiliko da (Amurrio, 06:10; Laudio, 08:15), baina 11:00etarako Basaurin izango da. Txorierritik pasatuko da bazkalondoan (Derio, 15:00), eta Uribe Kostatik ondoren (Getxo, 21:15). Gauean Ezkerraldera joko du (Barakaldo, 00:30).

Apirilak 11, osteguna. Bilbo izango da mugarri nagusia. Meatzaldetik igaroko da goizaldean, eta goizean Enkarterritik (Balmaseda, 07:45). 14:30ean izango da Bilboko Zazpikaleetan. Busturialdera joko du arratsaldean: Bermeora 20:15ean da iristekoa, eta Gernika-Lumora, 22:10ean. Lea Artibaira joko du gauean.

Apirilak 12, ostirala. Mutrikutik sartuko da Gipuzkoara sartuko da Korrika (06:00), eta, Urola Kosta igaro ondoren (Zarautz, 13:00), Donostian izango da arratsaldean, 16:30ean. Oiartzualdean izango da iluntzean (Errenteria, 22:50), eta gauean Beterri (Hernani, 01:25) eta Tolosaldea (Tolosa, 04:15) igaroko ditu.

Apirilak 13, larunbata. Goizaldean Goierrin eta Urola Garaian izango da lasterketa; Zumarragan, adibidez, 10:30ean. Debagoienera joko du eguerdirako (Oñati, 12:15), eta Debabarrenera ondoren (Eibar, 15:00). Bizkaira egingo du arratsaldean, Durangaldera (Durango, 19:00). Zornotzara iritsi ondoren (20:00), hegoaldera hartuko du, Arratia aldera (Igorre, 23:00).

Apirilak 14, igandea. Gauean Debagoiena igaroko du Korrikak berriro (Arrasate, 03:40), eta Legutiotik barrena sartuko da Arabara (06:10). Gasteizera joko du handik: 08:20 aldera sartuko da Arabako hiriburuan, Gamarratik, eta lau ordu igaroko ditu Gasteizen. Amaiera 12:30ean izango du.

Amaierako ekitaldi horretan irakurriko dute 11 egunez lekuko barruan eramandako mezua. Aurtengo Korrikak Jose Luis Alvarez Enparantza Txillardegi omenduko du, euskara batua sortzen egindako lanagatik.

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna

Izan zaitez BERRIAlaguna

Irakurtzen ari zaren edukia libre ematen jarraitu nahi dugu. Euskaraz informatzea da gure eginkizuna, zure eskubidea. Sareko irakurlea bazara, konprometitu zaitez irakurtzen ari zarenarekin. Geroa zugan.

Izan zaitez BERRIAlaguna