Espainia

PPren eta Ciudadanosen gobernua babestuko du Voxek Andaluzian

PPko Juanma Moreno izendatuko dute presidente, eskuineko hiru taldeen botoekin.

Voxeko eta PPko ordezkariak, gaur, akordioa sinatzen.
Voxeko eta PPko ordezkariak, gaur, akordioa sinatzen. Jose Manuel Vidal/EFE

Berria -

2019ko urtarrilak 9

Sevillan (Andaluzia, Espainia) sinatu dute akordioa PPko eta Voxeko idazkari nagusi Teodoro Garciak eta Javier Ortegak. 37 puntuko akordio bat itxi dute, Santiago Abascalen alderdiak jakinarazi duenez. Familia Saila sortzea adostu dute, besteak beste, eta baita Memoria Historikoaren Legea aldatzea ere: aurrerantzean Konkordiaren Legea izatea nahi dute. Ez dute dokumentuan jaso, aldiz, egunotan hedabideetan zabaldu duten guztia: indarkeria matxistaren inguruko legeak, Berdintasun Legea eta LGTBI kolektiboari buruzkoak bertan behera uztea, esaterako.

Ez dute halakorik hitzartu, baina Voxek iragarri du bide horretan jarraitzeko asmoa duela. Inbestiduran PPren eta Ciudadanosen akordioaren alde egin arren, ohartarazi dute beraien programan jasotakoak aurrera ateratzeko ahaleginak egingo dituztela parlamentuan.

Aurrez, PPk eta Ciudadanosek itxi dute beste akordio bat, gobernua osatzeko. Horren arabera, Juanma Moreno (PP) izendatuko lukete autonomia erkidegoko presidente, eta Juan Marin (Ciudadanos) presidenteorde. Gobernuak aurrera eraman beharreko neurri batzuk ere adostu dituzte. Marinek adierazi du "egun historikoa" dela gaurkoa Andaluzian, 36 urteren, PSOErena ez den gobernu bat egongo delako.

Marinek nabarmendu du PPk eta Voxek inbestidurarako lortutako akordioak ez diola zertan eragin gobernuari. "Akordio horrek [PP eta Voxenak] ez du ezertara lotzen gobernua, eta ez dio eragiten 90 puntuko akordioari ere [PPren eta Ciudadanosen akordioari].

PPk 26 aulki lortu zituen Andaluziako bozetan, Ciudadanosek 21 eta Voxek 12. Gehiengoa lortzeko, azken horren beharra zuten lehen bi alderdiek, eta gaurko akordioekin, ziurtatu dute hori. Inbestidurarako datarik ez dago oraingoz.

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna