2019ko lehen "lan instripu ez-traumatikoa" salatu du ELAk. 56 urteko langilea da hildakoa. Etxebarriko (Bizkaia) Arcelor Mittal enpresan ari zen lanean. "Ondoeza sentitu zuen, eta enpresako medikuek ospitalera bideratu zuten", sindikatuak azaldu duenez.
ELAk babesa eta elkartasuna adierazi die senide eta hurbilekoei, baita enpresako langileei ere. "Aurreko urteetan ikusi dugun bezala, lan istripu ez traumatikoek gorakada itzela izan dute azken urteotan prekarietate eta lan baldintzen okertzearen ondorioz", esan dute: "Administrazioek eta prebentzioan aritzen diren instituzioek ere datu larri hauen atzean zer dagoen ikertu beharko lukete". Egoera horiek gainditzeko, "antolatzera eta mobilizatzera" deitu ditu ELAk Euskal Herriko langileak.
