Bikoterik jotzaileenari eusteko gogotik lan egin behar izan dute Danel Elezkanok eta Beñat Rezustak. Lanak saria izan du, ordea. Seigarren garaipena eskuratuta, sailkapenaren buruan dira, Aimar Olaizolarekin eta Jon Ander Albisurekin puntutara berdinduta, baina tanto alde hobearekin.
Irribarriak eta Zabaletak hartu dute aurre markagailuan partidaren hasieran. 9-3 aurreratu dira, bien kolpe ahaltsuari esker. Irribarriak erremate guztiak asmatu ditu lehen tantoetan.
Elezkanok eta Rezustak defentsa lan handia egin behar izan dute bikote urdinaren bultzadari eusteko, eta partida gogortu dutenean, behera egin dute Irribarriak eta Zabaletak. Rezustak pilota asko sartu du azken koadroetatik, eta Elezkanok ere garesti saldu du tantoa aurrekoetan. Gainera, ongi baliatu ditu Irribarriak eta Zabaletak eskura utzi dizkioten pilota apurrak. Partida amaieran, egindako 10 tanto bildu ditu.
Gorriek 21-16koarekin lortu dute alderdik handiena. Irribarriak sakearekin min egin du amaieran, eta, aldea murriztu badu ere, urdinek ez dute partida berdintzea lortu.
Amaieran, 22-19. Gorriak sailkapeneko buru dira; Irribarria eta Zabaleta, berriz, hirugarren, bost punturekin.
