Gauerdian jaso dute abisua Nafarroako larrialdi zerbitzuetan. Sua piztu da Artaitzeko etxe batean, Untzitibarren, eta bertara joan dira Cordovillako suhiltzaileak. Iritsi direnerako, ordea, sua oso zabaldua zegoen, eta eraikinaren teilatua eroria zen.
Etxebizitzan 35 urte inguruko gizonezko bat bizi zen; haren bila ibili dira erreskate taldeak egun osoan zehar: ibilgailua bertan zuen, eta uste zuten lotan harrapatu zuela suteak. Iluntzean pertsona baten arrastoak aurkitu dituzte.
Suhiltzaileak goizean hasi dira hondakinak kentzen. Lehen zantzuen arabera, beheko solairuan zegoen erregai biltegi batean piztu da sutea.