Afrika

Laurent Gbagbo Boli Kostako presidente ohia askatu du Hagak

Gizateriaren aurkako krimenak egotzita epaitu du Nazioarteko Zigor Auzitegiak.

Gbagboren jarraitzaileak, gaur, Hagan.
Gbagboren jarraitzaileak, gaur, Hagan. PETER DEJONG / POOL / EFE

Mikel Rodriguez -

2019ko urtarrilak 15

2010eko hauteskundeen ondoren Boli Kostan gerra piztu zen Laurent Gbagbo orduko presidentearen jarraitzaileen eta Alassane Ouattara oposizioko buru eta oraingo presidentearen jarraitzaileen artean. Ouattarak iruzur egitea leporatu zion Gbagbori, eta horrek piztu zuen gerra. 3.000 pertsona inguru hil ziren bortz hilabete inguru iraun zuen gatazkan, eta 500.000 inguruk etxetik alde egin behar izan zuten. NBE Nazio Batuen Erakundeko kasko urdinek eta Frantziako armadak Ouattara babestu zuten, eta Gbagbo 2011n atxilotu zuten presidentearen jauregian.

Nazioarteko Zigor Auzitegiak epaitu duen lehenbiziko estatuburua izan da, baina epaileek ebatzi dute akusazioak ez duela frogatu Gbagbok gizateriaren aurkako krimenak egin zituenik. "Ez du frogatu Gbagbok jendaurreko hitzaldietan krimenak agindu edo sustatu zituenik", adierazi du Cuno Tarfusser epaileak.