AHT

Espainiako Gobernuak uste du "zaila" izango dela 'Euskal Y'-a 2023rako amaitzea

Arantxa Tapia kezkatuta azaldu da Jesus Loza EAEko Gobernu ordezkariak egindako adierazpenekin. Espainiako Gobernuak iaz baino 66 milioi gutxiago bideratuko ditu proiektura.

Jesus Loza, gaur, Gasteizen egindako agerraldian.
Jesus Loza, gaur, Gasteizen egindako agerraldian. David Aguilar / Efe

Iñaki Petxarroman -

2019ko urtarrilak 15

Jesus Loza Espainiako Gobernuak EAEn daukan gobernu ordezkariak gaur aitortu du "zail" ikusten duela tren lasterreko 'Euskal Y'-aren lanak 2023rako prest izatea. "Ez zait gustatzen esatea sinesten ez ditudan gauzak", adierazi du Espainiako Gobernuaren aurrekontu proiektuari buruz hitz egiteko gaur Gasteizen egindako agerraldian. Obraren bukaeraren datak aldatzen joan dira azken urteotan. Aurreko agintaldian 2019ko data eman ohi zuten Eusko Jaurlaritzatik, eta agintaldi honetan 2023koa aipatu dute. Data hori, baina, kolokan dagoela aitortu du gaur Madrilek.

Pedro Sanchezen gobernuaren aurrekontu proiektuak 234 milioi gorde ditu AHTko lanak egiteko, iaz baino 66 milioi gutxiago. Lozaren hitzek kezka sortu diote Arantxa Tapia Ekonomiaren Garapen eta Azpiegituretako sailburuari. "Bagenekien, 2023rako trena martxan jartzeko, nahiko aurrekontu bideratzeaz gain, oso azkar landu eta garatu beharko genituela proiektuak. Orain epeak zalantzan jartzen hasten bagara, bi gauzak hasten gara zalantzan jartzen: hau da, edo ez dela nahiko aurrekontu izango, edo ez dela behar bezain azkar jardungo", adierazi du.

Tapiak espero du, azpiegiturarako diruak murrizten badira, gainegiturarako partidak handitu egingo dela, hau da, bideen zati metalikoa, elektrifikazioa eta automatizazioa egiteko beharrezkoak direnak. Halaber, adierazi du espero duela Espainiako Gobernuak konpromiso zehatzak hartzea tren lasterra hiriburuetan sartzeko.

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna
S: