Zortzi ibilgailuk elkar jo dute 8:00ak aldera, Andoainen (Gipuzkoa), N-1 errepidean. Bi lagun zaurituta eraman dituzte Donostiako ospitalera. Hainbat anbulantzia eta suhiltzaileak joan dira istripua gertatu den lekura.
Ezbeharra Gasteizerako norabidean gertatu da, N-1ak Donostiatik datorren A-15 autobidearekin bat egiten duen puntua baino pixka bat aurrerago. Ibilgailuak ezkerreko lerroan traba egiten dute. Ondorioz, autoilara luzeak sortu dira noranzko horretan. Eusko Jaurlaritzako Trafiko zuzendaritzaren arabera, sei kilometro luze izatera iritsi dira. Kontrako noranzkoan ere, pilaketa izan da. Lau kilometro arteko ilarak sortu dira, nahiz eta norazko horretan oztoporik ez egon.
Istripuak A-15 autobideko trafikoari ere eragin dio. Iruñerako bidean eratu dira autoilarak. Andoaindik Hernani pareraino iritsi dira.
Hauxe da N1 errepidean Andoain parean dagoen panorama @berria@Aiurripic.twitter.com/F6NMRqX7nv
— Enekoitz Telleria (@EnekoitzTelle) January 16, 2019
