Ehun bat euskal artistak Eskoziarako bidea hartuko dute aurten. Herrialde horretako hiri nagusietan izango diren hogeitik gora kultur ekitalditan hartuko dute parte heldu den astetik urrira bitarte, Etxepare Euskal Institutuak bultzatutako ScotlandGoesBasque programaren barruan. Musikariak izango dira lehenak beren sorkuntzak erakusten, Glasgow bihar bertan hasiko den Celtic Connections jaialdian ariko baitira lau euskal musika talde: Kalakan, Huntza, Korrontzi eta Oreka Tx. Tosta Bandak ere kontzertu bat emango du bertan. Topaketa profesionalak ere egingo dituzte festibalaren barruan; atzerriko programatzaileak eta euskal musikaren sektoreko hainbat elkartetako ordezkariak elkartuko dira horietan.
Musikarien ondotik, beste hainbat sortzaileren txanda helduko da. Edinburgh International Book Festival, Edinburgh International Film Festival eta Fringe Dance jaialdietan ere izango da euskal ordezkaritzarik.
Bestalde, programa beraren barruan, euskara eta euskal kulturarekin lotutako eduki akademikoa landuko da Edinburgo, Glasgow eta Skyeko unibertsitateetan.
Eusko Jaurlaritzaren zein Araba, Bizkai eta Gipuzkoako foru aldundien laguntzarekin osatu du proiektua Etxepare institutuak, eta lerro nagusiak gaur aurkeztu ditu Irene Larraza institutuko zuzendariak, Eskozian arituko diren taldeetako musikariak eta Bingen Zupiria Kultura sailburua, Lorea Bilbao Bizkaiko Kultura diputatua zein Aintzane Oiarbide Gipuzkoako Bide Azpiegituretako diputatua alboan zituela.
