Asteazken gauean Bilboko Atxuri auzoan hilda agertutako 9 urteko neskatoaren ama espetxera bidaltzea erabaki du epaileak. Emakumea haurraren alboan agertu zen, konorte gabe, eta larri egin ditu egun batzuk Basurtuko ospitalean. Larunbatean hartu zioten deklarazioa, umearen heriotzarekin lotura izan zuelakoan, eta adierazpen horiek oinarri hartuta, atxilotu egin zuten; orain, kartzelaratzea agindu du epaileak. 40 urte inguru ditu andreak; ospitaleratuta dago oraindik.
Haurraren gorpuari autopsia egin zioten joan den astean; emaitzak ez dituzte publiko egin, baina Ertzaintzak uste du botikek pozoituta zendu zela neskatoa; hipotesi nagusia da amak eman zizkiola, eta gero bere buruaz beste egiten saiatu zela. Indarkeria arrastorik gabe aurkitu zituzten ama-alabak, baina eskuz idatzitako ohar bat topatu zuten haien ondoan; iturri ofizialek ez dute argitu testuak zer dioen.
Emakumea bi alabekin eta biloba batekin bizi zen etxean. Hain justu, beste alabak aurkitu zituen, 19 urteko emakume batek.