Gizartea

Desordena publikoa egotzi diete zazpi gazteri, Maravillas gaztetxearekin lotutako protestengatik

Labriteko aldapan eta Vergel zubian egindako protesten harira atxilotu ditu Espainiako Poliziak zazpi gazteak. 20:00ak pasata askatu dituzte.

Labriteko aldapan bidoietara kateatu ziren gazteak.
Labriteko aldapan bidoietara kateatu ziren gazteak. Maravilla gaztetxea

Garikoitz Goikoetxea -

2019ko urtarrilak 21

Zazpi gazte atxilotu eta eraman dituzte Espainiako Poliziaren Iruñeko egoitzara astelehen arratsalde honetan. Desordena publikoak eragitea eta zirkulazioa trabatzea leporatu diete, eta iluntzean utzi dituzte libre. Gazteetako batzuk Labriteko aldapan egindako protestagatik atxilotu dituzte: hormigoiz betetako bidoi batzuetara lortu ziren, eta zirkulazioa eten zuten. Besteak, berriz, Vergel zubian zintzilikatu zuten beren burua, alderik alde, eta zirkulazioa eten zuten.

Joan den larunbatean manifestazioa egin zuten gaztetxea itxi izana salatzeko, eta eraikin barrura sartu ziren berriro, ixteko jarritako hesia kenduta. Igande goizaldean, ordea, berriro hartu zuen eraikina Foruzaingoak.

Egoera horretan, elkarrizketarako mezua zabaldu du Joseba Asiron Iruñeko alkateak, eta horretarako baldintzak sortzeko eskatu die “erakundeei eta gazteei”. Alkateak jakinarazi du udala harremanetan jarriko dela prozesu bat abiatzeko. Gogoan izatekoa da EH Bildu lehen ere saiatu zela akordio bat negoziatzen gaztetxeko kideekin, baina ezerezean geratu zela ahalegin hura.

Alkateak ekitaldi publiko batean topo egin du Maria Solana gobernuko bozeramailearekin, eta baikor hitz egin du Solanak berak ere: “Alkateak hala uste badu, pentsatu nahi dut egongo dela soluziobideren bat, denon onerako”. Nolanahi ere, berretsi du Rozalejoko jauregian ezin daitekeela egon gaztetxea, “segurtasun arazoak” daudelako. Argudio horrekin itxi zuen eraikina gobernuak.

Hain justu, gaztetxeak txosten tekniko bat zabaldu du, gobernuaren argudioen aurkakoa. Arkitekto tekniko batek egin zuen azterketa abenduan eta urtarrilean, gobernuak eraikina itxi aurretik, eta, haren arabera, ez zen ageri arrisku “larririk edo berehalakorik” eraikinean.

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna