Larunbatean ezagutaraziko dituzte elkartearen izen eta logo berria, Donostian, Antzoki Zaharrean egingo duten ekitaldi batean. "Bide berriari hasiera emateko festa bat antolatu dugu", jakinarazi dute gaur Bilbon egin duten agerraldi batean. Gogora ekarri dute 2015ean jarri zutela martxan Chrysallis EH; Hego Euskal Herriko zortzi familiak jarri zituzten elkartearen zimenduak, eta egun ehun inguru dira. Transexualitate egoeran dauden seme-alaben gurasoak dira guztiak, eta haien artarako baliabide egokiak eskatu dituzte.
Elkartea handitzeak berak ekarri du, hein batean, horri izaera berri bat emateko gogoa, gaur azaldu dutenez. "Bazkide diren familien kopuru handiak, eguneroko lanaren konplexutasunak eta Euskadi eta Nafarroako berezitasun administratiboek Chrysalliseko lurralde ordezkaritza izaera gainditzera eraman gaitu", adierazi dute. Urteotan elkarte horren barruan ehundu dituzten harremanak lantzen jarraitu nahi dutela esan dute, baina "bide berri bat" hasi nahi dutela.
Urteotan, elkartearen abaroan, trebakuntza eskaini dute transexualitatearen arloan, eta kanpainak ere egin dituzte gaia gizarteratzeko. "Sostengu emozionala" ere izan dira hainbat familiarentzat, eta "aholkulari" jardun dute alorrean aritu behar duten profesionalentzat. "Lau urte hauetan haur eta nerabeen transexualitatearen ulermen eta laguntzan aldaketa historikoa bultzatu dugu, baita beren eskubideen errespetuan ere. Baina lan handia dago oraindik, eta hortik gure trantsitua eta berregituraketa", azaldu dute.
