azken ordukoa

Mikel Albisu libre utzi dute Madrilera iristean

Euskal presoa larunbatean irten zen Reauko kartzelatik, Frantziako zigorra osorik bete ostean. Ordutik gaur arratsaldera arte Parisko atxikitze zentro batean izan dute. Barajasera 20:00 aldera heldu da.

Mikel Albisu –eskubitik bigarrena–, senide eta lagunekin, libre geratu ostean.
Mikel Albisu –eskubitik bigarrena–, senide eta lagunekin, libre geratu ostean.

Enekoitz Esnaola -

2019ko urtarrilak 22

Mikel Albisu Iriarte libre da. Frantziako Estatuko zigorra osorik beteta, euskal presoa joan den larunbat goizean Reauko espetxetik atera zuten, baina handik Parisko atxikitze zentro batera eraman zuten. Han eduki dute gaur arratsaldeko hiru eta erdiak ingurura arte, Espainiaratu ahal izateko kudeaketa administratiboak egiteko zeudela eta. Ondotik, Parisen hegazkin batean sartu, eta Albisu (Donostia, 1961) 20:00 aldera iritsi da Barajasko (Madril) aireportura. Heldu behar pronto poliziek esan diote joan zitekeela etxera. Ez dute aireportuko komisaldegitik pasatu; hegazkinetik jaistean jakinarazi diote erabakia. Haren familia Barajasen zain zegoen, eta etxerako bidaiari ekin diote.

2004ko urriaren 3an atxilotu zuten, Saliesen (Biarno), ETArekin lotuta. 2010 bukaeran epaitu, eta hogei urtera zigortu zuten. Halaber, kondenaren amaieran Frantziatik kanporatzeko agindua ezarri zioten, eta gaur Espainiaratu dute. Espainiako Estatuan ez dauka auzibiderik irekita, eta, gainera, Xantiana Cachenaut abokatuak BERRIAri esan dionez, Frantziak 2005ean atzera bota zuen Madrilen euroagindu eskaera bat. Azkeneko unera arte "zuhurtzia" izan beharra zegoela esan du, ordea, defentsa abokatuak.

Sortuk larunbatean zioen "kalean" egon beharko lukeela Albisuk, eta Espainiako eta Fantziako estatuei eskatu zien "joko errepresiboak alde batera" uzteko­. Albisu aske geratu ondoren, "ongi etorri etxera, Mikel!" idatzi du txio batean Arkaitz Rodriguez Sortuko idazkari nagusiak.

Azkeneko urteetan, Reauko espetxean egon da preso Albisu, eta EPPKren bozeramaile lanak egin ditu, Marixol Iparragirre bikotekidearekin batera. Orain 46 euskal preso daude Frantziako Estatuan.

1985eko uztailean alde egin zuen etxetik, Joseba Sarrionandia eta Iñaki Pikabea presoek Martuteneko (Donostia) kartzelatik ihes egiteko lagundu zuenean. Poliziaren esanetan, Bidarteko (Lapurdi) 1992ko operazioaren ondoren ETAko zuzendaritzan sartu zen.

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna

Izan zaitez BERRIAlaguna

Irakurtzen ari zaren edukia libre ematen jarraitu nahi dugu. Euskaraz informatzea da gure eginkizuna, zure eskubidea. Sareko irakurlea bazara, konprometitu zaitez irakurtzen ari zarenarekin. Geroa zugan.

Izan zaitez BERRIAlaguna