CCOO, UGT eta USO sindikatuek Biobide enpresarekin joan den astean lortutako akordioa berretsi dute Bilbobuseko langileek. 367 lagunek eman dute aldeko botoa, eta 201 agertu dira kontra. Lau langilek boto zuria eman dute, eta bik baliorik gabea. ELA, LAB eta ESK sindikatuen jarreraren aurka erabaki dute langileek.
Akordioaren arabera, mugagabeko kontratu batzuk egingo ditu enpresak datozen urteetan: hamabost aurten, eta beste bi datorren urtean. Ordezkapenak egiten dituzten langileen poltsa Bilboko Udalaren esku geratuko da, bestalde. Era horretan nahi dute poltsa horren kudeaketa hobetzea.
Errelebo kontratuak ezartzen hastea eta pilatutako orduak erabiltzen hastea ere jaso dute akordioan. CCOO sindikatuak azaldu du, bestalde, lanaldi osoak gutxitu egingo direla (199 izango dira), eta hrorek lan karga gehiago eta kontratazio gehiago ekarriko dituela.
ELA sindikatuak ez dio funtsezko aldaketarik sumatu langileek onartutako testuari. Adierazi du akordioaren "eduki ekonomikoak" ez direla nahikoak, eta Bilbobuseko 130 langilek behin-behinekoak izaten jarraituko dutela.
Astelehenean hastekoa zuten greba, baina aurreko astean aurreakordioa eginda, atzeratu egin zuten, eta bihar asteazkena hastekoa zen greba sorta baten lehena. Akordiorik ezean, hilaren 21etik aurrera greba mugagabea egiteko asmoa ere agertua zuten. Abenduaren 20an eta urtarrilaren 12an ere egin zituzten aurreakordioak, baina langileek atzera bota zituzten bi aldi horietan. Orain akordioa eginda, bertan behera gelditu dira Bilbobusen greba deialdiak.
Bizkaibusen ere, Durangaldeko, Arratiako eta Hego Urbieko lineetan, amaitu dira lanuzteetarako deiak. CCOO, UGT eta USO sindikatuek adostutako akordioa onartu zuten astelehenean linea horietako langileek ere. Ezkerraldeko eta Meatzaldeko lineetan ere egin zituzten akordioak, eta Mugialdeko eta Txorierriko lineetan ere bai.
