Urtarrilaren 18an izan zen ezbeharra. Zabalgana auzoko Nazio Batuak etorbidean harrapatu zuen kotxeak hamalau urteko neska, zebrabidea gurutzatzen ari zenean. Buruan izandako kolpe larriaren ondorioz, Txagorritxuko ospitalean izan da geroztik. Gaur goizean hil dela jakinarazi du Gasteizko Udalak.
Bizilagunek elkarretaratzea deitua dute gaurko; istripua izan zen lekuan bilduko dira, 18:00etan.
Auzokideek aspaldi eskatu dituzte neurriak kale horretan, oinezkoentzako "segurtasun falta" dagoela eta. Errepide horrek "autobidea" dirudiela salatu dute. Udalak hainbat neurri hartuko dituela iragarri du egunotan; besteak beste, abiadura neurtzeko radar bat jarriko du han.