Europako Batasunak eta haren baitan dauden hainbat herrialdek Venezuelako Gobernuari emandako ultimatuma ez da izan Nicolas Maduro presidentearen gustokoa. "Harrokeriaz" jokatzea egotzi die Europako agintariei eta gogorarazi die Venezuela ez dagoela Euoparen menpe. "Europako eliteen jarrera ez da herritarren iritziaren isla. Inork ezin digu ultimatumik eman. Norbaitek Venezuelatik joan nahi badu, joan daila".
Haserre hitz egin du estatuburuak Europako herrialdeek eta zehazki Espainiak hartu duten jarreraren inguruan. "Trumpen atzean" jarri izana leporatu dio Pedro Sanchez presidenteari, hark Erresuma Batua, Alemania eta Frantziako gobernuekin bat eginik bozak egiteko zortzi egineko epemuga jarri izana gaitzetsiz.
Hauteskundeak deitu ezean, Juan Guaido oposizioko burua presidentetzat aitortuko dutela ere egin diote mehatxu Europako agintariek. Baina Madurok gogorarazi du Guaidoren aldarrikapena Konstituzioaren aurkakoa dela, eta Botere Judizialari dagokiola gertatutakoari buruzko erabaki hartzea.
AEBen bulegoak hutsik
Madurok berak iragarri du AEBetako administrazioak atera dituela Caracasen zituen diplomazialariak, eta itxita daudela haren bulegoak. Estatuburuak 72 orduko epea jarri zion Washingtoni herrialdean zituen diplomazialari guztiak ateratzeko, eta hark hasieran entzungor egin zien arren, gerora Venezuelatik ateratzeko aholkatu zien bertan dauden estatubatuarrei.
Aldi berean, etxera bidean dira Venezuelak AEBetan zituen diplomazialariak ere. Caracasek amaitutzat eman ditu Donald Trumpen gobernuarekiko harremanak, hark Guaido "presidente zilegitzat" jo ostean.
Maniobra militarrak
"Inoizko maniobra militarrik "handienak" iragarri ditu estatuburuak otsailaren 10a eta 15a bitartean. Helburua "Venezuelaren indarra erakustea" dela iragarri du.
Armadak leialtasuna berretsi zion Madurori estatu kolpea izan eta hurrengo egunetan. Orain Madurok "batasuna" eskatu die militarrei: "Herriari, iraultzari eta aberriari leialtasunez jokatuko du armadak"
