1970eko eta 1980ko hamarkadetan Bilboko ikastetxe erlijioso batean ikasleen aurka gertatutako sexu erasoak eta indarkeria fisikoa azaleratu dituzte zortzi gizonek. El País kazetak jakinarazi duenez, Deustuko Salestarretako irakasle ohi baten aurkako salaketa jarri dute asteon Ertzaintzaren aurrean. Jose Miguel San Martin du izena, eta hainbat talderen tutore, ikasketaburu eta aholkulari psiklogiko izan zen. Biktimek, berriz, 8 eta 10 urte bitartean zituzten. Ukituak, muxuak, masturbazioak, bortxaketak eta jipoiak izan zirela azaldu dute; eskolako sotoan eta ikasgeletan egiten zizkien, baita udalekuetan ere. Egunkari horrek bildutako testigantzen arabera, "beldurrez" bizi ziren mutikoak, erasoak "ohikoak" zirelako.
Eusko Jaurlaritzako Segurtasun Sailak jakinarazi du Ertzaintzak zazpi salaketa ikertu dituela, eta epaitegira bidali duela txostena. Ikastetxean ere "barne ikerketa" bat abiatu dute, Salestarren Kongregazioak ohar bidez jakinarazi duenez; ikasle ohiei babesa adierazi die, eta "justiziarekin kolaboratzeko" prest agertu da. Era berean, "barkamena" eskatu du, "halako ekintza gaitzesgarririk gertatu bada".
Dena den, ikastetxeak ukatu du erasoen garaian irakaslearen aurkako kexarik jaso izana. Salatzaileetako batek El País-en azaldu duenez, ordea, bere amak eta beste ikasle baten gurasoek ikastetxeko zuzendariarengana jo zutela, eta hark gomendatu ziela Polizian salaketarik ez jartzea. Handik gutxira, ordena utzi zuen San Martinek. Irakaslearekin berarekin ere hitz egitea lortu du kazeta horrek, eta hark ukatu egin ditu akusazioak, baina adierazi du "gauza batzuk txarto interpreta" zitezkeela.