Hotz hasi dute Altuna III.ak eta Martijak Victor eta Aretxabaletaren kontrako partida, gaur, Bilbon. Irabaztea oso garrantzitsua zen bikote gorriarentzat, finalerdietara sailkatzeko aukerei eusteko. Faborito ziren, eta presioa nabaritu dute. Hala aitortu dute biek neurketaren ostean. Victor eta Aretxabaleta, berriz, txukun aritu dira aurkariak partidan sartu ezinik egon diren artean. Neurketa gogortu denean, berriz, ihes egin diete Altunak eta Martijak.
Bikote gorria 8-3 aurreratu da paritdaren hasieran, baina 8-8 berdindu dute lehia urdinek, Victorren eginiko tanto bikainei esker. Aurretik ere jarri dira hiru tantoko aldearekin (10-13). Altunak eta Martijak lotuta jokatzeari eta gehiago gozatzen hasi direnean aldatu da partida. 13-13 berdin dute, 14-14 ere bai; hortik aurrera, 22. tantorainoko zortzi tantoak egin dituzte segidan gorriek, eta bosgarren garaipena eskuratu dute.
Victorri eta Aretxabaletari irabazita, sailkapenaren bosgarren postuan dira Altuna eta Martija, bost garaipenekin, laugarren diren Artola eta Mariezkurrenarengandik irabazitako partida bakarrera.
