600 euroko isun bat jarri zioten aurrena gazte bati, ertzainei euskaraz aritzeko eskubidea exijitzeagatik haien "lana oztopatzea" leporatuta. Gaur Argia-k jakinarazi duenez, gainera, Lander Arbelaitz kazetaria ere salatu dute ertzainak "iraintzeagatik". Martxoaren 20an deklaratu beharko du Donostiako 2. instrukzio auzitegian.
Maiatzaren 21eko agerraldi batean du jatorria guztiak: Bizitza Da Handiena dinamikaren barruan egin asmo zuten Ernaiko kideek, Gipuzkoako diputazioaren aurrean, turistifikazioa salatzeko.
Ernaik salatu zuenez, Ertzaintzak identifikazioa eskatu zion gazte bati, erdaraz. Hark, euskaraz eskatuz gero emango ziela erantzun zien. Eztabaida baten ondotik, hala egin zuen: euskaraz identifikatzeko eskatzean, nortasun agiria eman zien gazteak, Irutxuloko Hitza-ren bideo honetan ikus daitekeenez:
[youtube]https://youtu.be/J0pR-Ld-qsw[/youtube]
🔴 Gogoratzen duzue bideo hau?
— Ernai 🚧 #AteakItxi (@ernaigazte) 2019(e)ko urtarrilaren 28(a)
1⃣ Ertzaintzak @ErnaiDonostia|ko kide bat identifikatu zuen euskaraz aritzeagatik.
2⃣ @behatokia bidez, Segurtasun Sailaren barkamen publikoa jaso zuen gure kideak.
3⃣ 600€ko isuna jaso berri du.
Euskaraz aritzeagatik, 600€-ko isuna!
😱😡 pic.twitter.com/1VgrbaFFg6
Identifikazio haren ondorioz iritsi zitzaion 600 euroko isuna gazteari. Aurrez, Behatokiak kasua salatu zuen, eta Eusko Jaurlaritzako Segurtasun Sailak barkamena ere eskatu zuen agenteen jarreragatik —Argia-k jakinarazi duenez, salaketa jarri dute bi ertzainek ukatu egin dute barkamena eskatu izana—.
Orain, Argia-ko kazetari Lander Arbelaitzen aurkako salaketa jarri dute bi agentek Donostiako 2. instrukzio auzitegian, gertakari haren berri ematean ertzainak "iraindu" zituela leporatuta. Martxoaren 20an deklaratu beharko du kazetariak auzitegian.
Argia-k nabarmendu du hizkuntz eskubideen inguruko gatazka duela jatorrian horrek guztiak, zabaldutako bideoetan ikus daitekeenez: "Ertzainek haien aurkako irainak aipatzen dituzte, baina une horretan kazetariak begi aurrean zuen egoeraren interpretazioa besterik ez da. Hizkuntza gatazka baten ondorio dela identifikazioa interpretatzea guztiz zentzuduna da, eta bideoa da horren froga nagusia".
Bihar agerraldi bat egingo dute Ernaik eta EHEk.
Bizitza Da Handiena dinamikaren barruan egindako protesten ondorioz, kide gehiago ere salatu zituzten —bi atxiloketa ere izan ziren aste hartan—. Irailean jakinarazi zutenez, auzi bat irekita dago gutxienez auzitegietan.