Michel Portal Baionak omendua

Gaurtik hasita Michel Portal musikariak hiru egunez hiru kontzertu ematekoak ditu Confluences jaialdiaren karietara; Baionako udala baliatuko da hitzorduaz Baionako antzokiari "Michel Portal" izendatzeko larunbat honetan

Michel Portal musikaria Donostiako Jazzaldia saria jaso  zuenean, iaz
Michel Portal musikaria Donostiako Jazzaldia saria jaso zuenean, iaz Jon Urbe

Nora Arbelbide Lete -

2019ko otsailak 7

1935an Baionan sortua, geroztik mundua zeharkaturik, Parisen bizi aspaldian, Baionak ez duela ahantzia gogoratu nahi dio udalak Michel Portal artistari. Klarinete jotzaile bezala ezagutua bada, puntako maila ere badu  klarinete baxua, saxo altua, tenorra eta sopranoan.  Artista sailkaezina bezala aipatua, Europako free jazz deitu musika estiloaren barnean nabarmenduetako bat da, klasikoan ere ibilbide aberatsa duelarik. Esperimentazioak gustuko, konpositore bezala ere bide luzea du.

Baionako udalak antzokiari bere izena ematea erabaki du. Larunbat honetarako du finkatua du izenaren plakaren estreinaldia, 11:00etan antzokian.  Egun berean 15:00etan Elkar saltegian izanen da artista, solaserako libre.

Kontzertu aldetik, gaur du lehena Michel Portalek Bojan Z piano jotzailearekin, 20:30ean antzokian.  Larunbateko kontzertuan Paul Meyer klarineta jolea eta Jerome Ducros pianistarekin partekatzekoa du Henri Grenet auditoriumeko oholtza Portalek, 19:00etan. Eta igandean Vincent Peirani eta Emile Parisien belaunaldi gazteko bi musikariekin. Hitzordu hau ere auditoriumean da, 19:00etan. 

Hitzorduak Confluences jaialdiaren karietara antolatzen ditu udalak. Hiru kontzertuak urririk dira eta jadanik beteak dira. Lekuak izateko hobe Herriko Etxera deitzea lehenago.

 

 

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna