111 Akademiak 111 aldizkaria argitaratzeari utziko dio. 2018ko abenduan kaleratu duen zenbakia, 10.a, azkena izango da, oraingoz. Erabaki horren atzean dagoen arrazoi nagusia ekonomikoa da, 111 Akademiak ohar baten bitartez jakinarazi duenez: "2018an izandako diru-galeraren ondorioz 111 Akademiari guztiz ezinezkoa zaio 2019an paperezko argitalpenak dakarren gastua bere gain hartzen jarraitzea. Momentu mingarrian dator, gainera, erabakia, orain hilabete eskas harpidetzak handitzeko ekinaldia egin eta eskaerak jasotzen hasiak baikinen”. 2018ko diru-kontuek agerian utzi dute oraingoz behintzat ez dagoela paperezko argitalpenarekin aurrera egiteko modurik.
111 Akademiak 2014an jarri zuen abian 111 aldizkaria-ren proiektua. "Ordutik, erakundeekiko elkarlana bilatzeko Akademiako arduradunek egindako ahalegina etengabea izan da, egitasmoa egonkortu eta bestelako diru-iturriak sendotu bitartean aurrera egitea ahalbidetuko zion elkarlana, hain zuzen ere. Irakurle arruntari literaturari buruz euskaraz informazioa emango zion argitalpena aurrera ateratzen saiatzeak ahalegin oro merezi zuelako uste sendoa genuen. Ahalegin horiek, ordea, ez dute esperotako fruiturik eman, eta 10. zenbakira iritsi ostean, egitasmoa bertan behera uztea beste irtenbiderik ez zaigu geratu”, adierazi dute aldizkariaren arduradunek.
Oraingoz, 111 Akademiaren webgunean ahaleginduko dira aldizkariak jasotzen zituen edukiak argitaratzen.
