Katalunia

Kataluniarekiko elkartasuna Bilbon

Pankarta handi bana jarri dute Bilboko udaletxean, udaletxe ondoko zubian eta Guggenheim museoan, autodeterminazioa ez dela "krimena" aldarrikatzeko.

Bilboko udaletxea, gaur goizean.
Bilboko udaletxea, gaur goizean. @ANCEuskalHerria

Berria -

2019ko otsailak 10

Kataluniarekiko elkartasun mezuekin esnatu da Bilbo gaur. ANC Kataluniako Asanblea Nazionalaren Euskal Herriko ordezkaritzak zabaldu duenez, pankarta handi batzuk jarri dituzte Bizkaiko hiriburuan. Tartean, baita udaletxean ere. Autodeterminazioa eskubidea da, ez krimena, irakur daiteke pankartetan.

Guggenheim museoaren kanpoaldean eta udaletxe aurreko zubian ere jarri dituzte pankarta handiak.

Asteartean da hastekoa Espainiako Auzitegi Gorenean buruzagi independentista katalanen aurkako epaiketa. Euskal Herrian ere antolatu dituzte mobilizazioak, elkartasuna adierazteko. 

Europako hainbat hiritan mobilizazioak egingo ditu ANCk, eta zerrenda horretan sartu ditu Hego Euskal Herriko lau hiriburuetan egingo dituzten elkarretaratzeak. Bilbon, 20:00etan jarri dute ordua, Arriaga plazan. Gainerako deialdiak 19:00etan izango dira, Donostiako Bulebarrean eta Gasteizko Andre Maria Zuriaren plazan. Iruñean ez dute oraindik lekua zehaztu. ANCk azaldu du Euskal Herrian egingo diren protestak Gure Esku Dago-k sustatuko dituela.

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna