Pasaiako Udalak adierazi du Jaizkibelgo tiro eremuko pistaren lanak "klandestinoak" direla

Eguzki talde ekologistak jakinarazi duenez, udalak azaldu du Espainiako Indar Armatuek ez diotela eskatu lanetarako baimenik.

Jaizkibelgo tiro eremurako pista.
Jaizkibelgo tiro eremurako pista. Eguzki

Berria -

2019ko otsailak 11

Jaizkibelgo tiro eremurako lanak "legez kanpokoak" direla salatu du Eguzki talde ekologistak. Pasaiako Udalak jakinarazi du Espainiako Indar Armatuek ez diotela inolako baimenik eskatu tiro eremurako pistaren lanak egin ahal izateko. "Beraz, legez kanpokoak dira edo, udal teknikarien txostenean irakur daitekeen bezala, ezkutukoak, klandestinoak", adierazi du Eguzkik. Udalak hilabeteko epea eman dio Defentsa Ministerioari lanak legeztatzeko proiektu bat aurkez dezan.

Udalak gaineratu du Foru Aldundiari dagokiola lan horien erantzuleak zigortzeko eskumena, 7/2006 Foru Arauari erreparatuta. Eguzkik nabarmendu du iaz salatu zuela aldundiaren aurrean Espainiako Indar Armatuak egin duen obra, baina foru gobernuek ez zuen esku hartu. "Aldundiak erantzun zuen ez zuela horretarako eskumenik", azaldu du Eguzkik. "Horregatik, oraingoan, Pasaiako Udalaren txostena eskuetan, Eguzkik zigor espedientea irekitzeko eskatuko dio Aldundiari".


Eguzki

Talde ekologistaren iritziz, tiro eremuko pistaren lanek berriro utzi dute agerian indar armatuen jokabide "agintzailea". Horrez gain, ohartarazi du "zentzugabea" dela Natura 2000 Sareko Babes Bereziko Eremu batean gisa horretako instalazio militar bat egotea. Gipuzkoako Foru Aldundiak "Jaizkibelen eta, oro har, Natura 2000 Sareko eremuetan sarri nagi edo arduragabe jokatu ohi duela" ere agerian utzi du, Eguzkiren esanetan.

 

 

 

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna